AuTo NeWs

ელექტრომობილი ელექტროციკლის წინააღმდეგ - გამარჯვებული გარემო დარჩება

BMW — Wed, 22 Sep 2010 07:22:50 GMT

ამ ფოტოებზე ელექტროძრავით აღჭურვილი ორი სარბოლი მანქანაა - ერთი, ოთხბორბლიანი რომაა, იმას ”სიტროენ სარვოლტი” ჰქვია. მეორე კი, ორბორბალა ”აგნი Z2”. ისინი ერთმანეთს შეაჯიბრეს და ვინ გაიმარჯვა? ამის თაობაზე, ამ საინტერესო პაექრობის ორგანიზატორი, ფრანგული კომპანია ”სიტროენი” არაფერს ამბობს.

სამაგიეროდ, ვინც ამ ინფორმაციას წაიკითხავს, ან შესაბამის ვიდეოს იხილავს (http://www.youtube.com/watch?v=HgoXticUgvU&feature=player_embedded), მას გონებაში სამუდამოდ აღებეჭდება, რომ ელექტრული აგრეგატით აღჭურვილ მანქანებსაც შეუძლიათ რბოლა. და, როგორც მათი პილოტები ამბობენ, ძალიან ტემპერამენტიანებიც არიან. ნუ, რა თქმა უნდა, არა იმდენად, როგორც ვთქვათ, ”ფერარის”, ან ”ლამბორგინის” კვიცები და ხარები, მაგრამ საკმაოდ ტემპერამენტიანები იმისათვის, რომ ობივატელს ელექტრომობილებზე წარმოდგენა შეუცვალონ და მისადმი დამოკიდებულება შეაცვლევინონ. ეს კი იმის საწინდარი იქნება, რომ როდესაც კომპანიები ეკოლოგიურად სუფთა მანქანების წარმოებას მასობრივად მიჰყოფენ ხელს, ბაზარი და შესაბამისად, მყიდველთა ძირითადი კონტინგენტი, ამისათვის მაქსიმალურად მომზადებული დახვდებათ.

შეჯიბრის ორგანიზატორებმა ორივე ელექტრული მანქანის პილოტებად ქალები მიიწვიეს. ”სიტროენის” საჭეს ლეგენდარული ბელგიელი ჯეკი იქსის (ფორმულა 1-ის ყოფილი პილოტი და ლე მანის და დაკარის არაერთგზის ტრიუმფატორი) ქალიშვილი ვანინა იქსი მიუჯდა, ვინც თავადაც მამის კვალს გაჰყვა და ლე მანის სერიასა და ტურიზმის კლასის ჩემპიონატებში ასპარეზობს (რა თქმა უნდა, სახელოვან მამას ვერ შეედრება), ელექტროციკლის უნაგირი კი ჯენი ტინმუთს ჩააბარეს, რომელიც ალბიონზე უსწრაფეს ქალად ითვლება.

ალბათ მიხვდით, შეჯიბრი საჩვენებელი იყო და მისი დანიშნულება გამარჯვებულის გამოვლენა არ ყოფილა. ფინიშის შემდეგ კი მისი მონაწილენი აღტაცებას ვერ მალავდნენ.

”ფანტასტიური შეგრძნება მქონდა. სხვა თუ არაფერი, ამ ტიპის პირველ ელექტრულ დუელში მივიღე მონაწილეობა. მანქანები ხმაურის გარეშე მოძრაობდნენ და ეს ჩვენთვის განსაკუთრებული გამოწვევა იყო. საერთოდ, როდესაც ტრასაზე ხარ, მეტოქის ადგილმდებარეობას მისი მანქანის ხმის მიხედვით ხვდები. მაგრამ ელექტრული მანქანები ხომ უხმაუროა. მოკლედ, დიდი სიამოვნება მივიღე და მიხარია, რომ ასეთ უნიკალურ შეჯიბრში მივიღე მონაწილეობა”, - განაცხადა ვანინა იქსმა.

მოტოციკლისა რა გითხრათ, მაგრამ ”სიტროენ სარვოლტს” უნიკალური (სარბოლი ავტომობილის შესაფერისი) აგებულება აქვს. მისი შასი ფოლადის მილებისგანაა შეკრული, ძარა კი კარბონის კომპოზიტის ნაწარმია. მსუბუქი მასალების უხვად გამოყენების წყალობით, ელექტრომობილი მხოლოდ 1.15 ტონას იწონის, რაც მის შესანიშნავ დინამიურობას განაპირობებს.

მის მოძრაობას ორი ელექტროძრავი უზრუნველყოფს, რომელთა ჯამური სიმძლავრეც 300 ცხენის ძალას (5 000 ბრ/წთ-ზე) აღწევს. მათი მეშვეობით, ”სარვოლტს” მაქსიმუმ 260 კმ/სთ სიჩქარის აკრეფა შეუძლია, ადგილიდან 100 კმ/სთ-მდე ასაჩქარებლად კი მას 5 წამზე ნაკლები ჰყოფნის.

რა თქმა უნდა, გაცილებით მსუბუქია ელექტრომოტოციკლი, რომელიც მხოლოდ 220 კილოგრამს იწონის. სამაგიეროდ, მას უფრო სუსტი, 65-ცხენისძალიანი ელექტროძრავი ემსახურება. და მაინც, მისი აჩქარება გაცილებით უკეთესია - 0-100 კმ/სთ-მდე მხოლოდ 3.5 წამში. სამაგიეროდ, მისი მაქსიმალური სიჩქარე მხოლოდ 210 კმ/სთ-ია.

”პეჟო” ჰეჩბეკ 206-ის ევროპაში წარმოებას 2013 წელს შეწყვეტს

BMW — Tue, 21 Sep 2010 08:43:00 GMT

მიუხედავად იმისა, რომ ფრანგული კომპანია ”პეჟო” მოდელ 207-ის წარმოებას 2006 წელს შეუდგა, კონვეიერიდან ჯერაც არ მოუხსნია მისი წინამორბედი 206, რომელიც ევროპულ ბაზარზე პირველად 1998 წელს გამოჩნდა და აქამდე კარგი გაყიდვებით გამოირჩევა. თანამედროვე ავტოინდუსტრიაში ავტომობილის ასეთი ხანდაზმულობა დიდი იშვიათობაა. ძნელია იმის გახსენება, თუ ბოლო ორ ათწლეულში, ბაზარზე უცვლელად 13 წელი რომელმა სხვა ავტომობილმა გაძლო.

უფრო მეტიც, სამი წლის შემდეგ, ევროპაში მისი წარმოება მხოლოდ იმ მარტივი მიზეზის გამო შეწყდება, რომ ის ვეღარ დააკმაყოფილებს ევროკავშირის რიგ კანონებს. ამასთან, ევროპაში კონვეიერიდან კი მოიხსნება, მაგრამ 206-ის სხვადასხვა მოდიფიკაციის წარმოება ჩინეთში, ირანსა და სამხრეთ ამერიკაში კვლავაც გაგრძელდება.

ჰეჩბეკ 206-ის წარმოება ”პეჟომ” 1998 წელს დაიწყო და მაშინვე ამ სუბკომპაქტურმა ავტომობილმა დიდი პოპულარობა მოიპოვა. ჯერ ერთი, ის ლეგენდარული 205-ის შთამომავალი იყო. მეორეც, მყიდველს საკმაოდ ხელმისაწვდომ ფასში მიეწოდებოდა. დებიუტისთანავე, 206 ფრანგული კომპანიის ბესტსელერი გახდა. ”ლომებმა” რვა წლის განმავლობაში, 5 მილიონზე მეტი 206 გაყიდეს. შემდეგ კი ბაზარზე მისი შემცვლელი 207 გამოჩნდა, თუმცა ”პეჟოს” ძველი მოდელის წარმოების გაგრძელებაზე ბევრი არც უფიქრია.

თავიდან 206 მხოლოდ ჰეჩბეკის ძარით იყიდებოდა. 2001 წელს კი პლატფორმაზე ორი სხვა ძარაც დადგეს. ბაზარზე ჯერ უნივერსალი 206 SW გამოჩნდა, შემდგ კი - კუპე-კაბრიოლეტი 206 CC. ამ უკანასკნელს მეტალის დასაკეცი სახურავი ჰქონდა, რამაც მისი პოპულარობა განაპირობა. გავიდა კიდვ ოტხი წელი და ”ლომებმა” ბაზარზე ოთხკარიანი სედანისძარიანი 206 გამოიტანეს. თუმცა, ისიც სათქმელია, რომ ეს უკანასკნელი მხოლოდ ზოგიერთი განვითარებადი ქვეყნის ბაზარზე (მათ შორის, საქართველოშიც) იყიდება.

”სიტროენის” და ”ლაკოსტის” ერთობლივი კონცეპცია

BMW — Tue, 21 Sep 2010 08:42:30 GMT

სერიულ სიახლეებთან ერთად, ”სიტროენმა” პარიზული საავტომობილო რანდევუსთვის ერთი კონცეპტუალური მოდელიც შეიმუშავა, რომლის შექმნაში მონაწილეობა სპორტული ეკიპირების მწარმოებელი კომპანია ”ლაკოსტის” სპეციალისტებმაც მიიღეს. ავტომობილს მისი შემქმნელების სახელი ჰქვია - ”სიტროენ ლაკოსტი”.
ეს მხიარული კონცეპტუალური ავტომობილი თავისი უცნაური გარეგნობით გამოირჩევა. აშკარაა, რომ შემქმნელებმა ის გართობის და სპორტული სტილის მოყვარული ახალგაზრდა ადამიანებისთვის შექმნეს. მაგრამ, სპორტული ამ შემთხვევაში ავტომობილის სპორტულობას სულაც არ ნიშნავს.
”სიტროენ ლაკოტს” ისეთივე მომცრო გაბარიტები აქვს, როგორიც ფრანგული საავტომობილო კომპანიის ყველაზე პატარა ავტომობილს - ჰეჩბეკ C1-ს. მისი სიგრძე სულ რაღაც 3.450 მეტრია, სიგანე 1.800 მეტრი, სიმაღლე კი 1.520 მეტრი. სამაგიეროდ, შედარებით გრძელი ბაზა (2.300 მეტრი) აქვს. სხვათა შორის, C1 კონცეპტ ”ლაკოსტზე” მოკლეცაა, ვიწროც და დაბალიც. სერიულ ჯუჯას მხოლოდ ბაზა აქვს უფრო გრძელი (სულ რაღაც, 40 მილიმეტრით).
რაც შეეხება ძარას, ძნელია, ის რომელიმე არსებულ კლასს შეადარო. ჩვეულებრივი ღია ავტომობილებისგან ჰანსხვავებით, მისი მგზავრების თავებს ხიფათისგან გრძივი რკალი იცავს. ჩვეულებრივ, ღია ავტომობილებში ამ დანიშნულებას განივი რკალი ასრულებს ხოლმე. დაცვითი ფუნქციების გარდა, რკალს სხვა დანიშნულებაც აქვს. კერძოდ, მასზე მოთავსებულია სახელურები, რომლებსაც მგზავრები ავტომობილში ჩაჯდომისას დაეყრდნობიან. გარდა ამისა, რკალში ჩამალულია გასაშლელი სახურავი, რომელიც მოყვითალო ფერისაა და თან გამჭვირვალე. ასე რომ, თუ მოულოდნელად გაწვიმდა, სეირნობისას მსწრაფლ გადახურვაც შეიძლება და თან ისე, რომ თავი მაინც ღია მანქანაში იგრძნო.

თუმცა, წვიმისგან და ქარისგან სრულად დაცული მაინც ვერ იქნებით, რადგან ”სიტროენ ლაკოსტს” არ გააჩნია კარები. და თუ მძღოლისა და წინა მგზავრისთვის ჩაჯდომის გასაადვილებლად, ძარას სპეციალური ჭრილი აქვს, უკანა მგზავრები მასში მხოლოდ ჩახტომას თუ შეძლებენ. რას იზამთ, ესეც სპორტული სტილია. გარდა ამისა, ავტომობილს არ გააჩნია საბარგული.

გარდა იმისა, რომ მის შექმნაში (სიმბოლური) მონაწილეობა ავტომობილებთან არანაირი შეხების არმქონე ”ლაკოსტმა” მიიღო, ეს ავტომობილი ბევრი ორიგინალური დიზაინის დეტალითაც გამოირჩევა. ასეთია მაგალითად საჭის რბოლი, რომელიც ველოსიპედის ბორბალს მოგაგონებთ. თვითონ ”სიტროენ ლაკოსტიც” ხომ უცნაური ფორმებით გამოირჩევა. ეს ითქმის მის სავარძლებზე და ბორბლებზე. ასევე მაჩვენებლების დაფაზე, საქარე შუშასა და ბამპერებზე, ასევე წინა და უკანა ფარებზე. რაც მთავარია, ყველაფერი, მათ შორის, ფერების შეხამებაც, დახვეწილი გემოვნებითაა შესრულებული.

კონცეპციის ავტორები არაფერს ამბობენ მათი ქმნილების აგრეგატებზე და სხვა აღჭურვილობაზე. შესაძლოა, ეს ”საიდუმლო” პარიზში, პრეზენტაციის დროს გაიხსნას. თუმცა, ამას დიდი მნიშვნელობა მაინც არ აქვს, რადგან ძნელი წარმოსადგენია, ამ ავტომობილმა ოდესმე კონვეიერამდე მიაღწიოს...

”ბეემვეს” მე-6 სერიის კუპე პარიზული დებიუტისთვის ემზადება

BMW — Mon, 20 Sep 2010 19:24:36 GMT

პარიზის საავტომობილო გამოფენაზე, ”ბეემვეს” პავილიონის ერთ-ერი მთავარი პერსონაჟი, მე-6 სერიის კუპეს კონცეპტუალური ვერსია იქნება, რომლის შესახებაც, ბავარიელებმა მწირი ინფორმაცია და ფოტოები, პრემიერამდე ცოტა ხნით ადრე, ინტერნეტით გაავრცელეს.

ეს ავტომობილი, გერმანული კომპანიის მთავარ დიზაინერ ადრიან ფან ჰოოიდონკის ხელმძღვანელობით შეიქმნა და მასში ”ბეემვეს” ახალი კორპორატიული სტილის ელემენტები ჩანს. ამასთან, ის რაღაცით მე-5 სერიის ახალ სედანსაც ჰგავს. კუპეს გრძელი კაპოტი და საგრძნობლად უკან დაწეული სალონი გამოარჩევს, რაც მის სპორტულობას უსვამს ხაზს. კონცეპტუალურ მოდელზე ბავარიელებმა შუქდიოდებისგან დამზადებული მთავარი ფარები გამოიყენეს, რომელსაც ალბათ მე-6 სერიის ტოპ ვერსიებზე დააყენებენ.

რა თქმა უნდა, ახალ ავტომობილს წამყვანი უკანა ბორბლები აქვს, თუმცა დიდი შანსია იმისა, რომ ბავარიელებმა მყიდველს მისი სრულამძრავიანი ვერსიაც შესთავაზონ. ავტომობილი V8-ცილინდრიანი ტურბოდამჭირხნიანი აგრეგატით აღიჭურვება, რომლის მუშა მოცულობა 4.4 ლიტრი, მაქსიმალური სიმძლავრე 395 ცხენის ძალა, მაქსიმალური მაბრუნი მომენტი კი 609 ნიუტონმეტრი იქნება.

ინგლისურ ჟურნალ ”ავტოქარის” ვერსიით, ახალი მე-6 სერიის კუპეს გაბარიტებია: სიგრძე 4.820 მეტრი, სიგანე 1.855 მეტრი და სიმაღლე - 1.375 მეტრი. საბარგულის მოცულობა კი 450 ლიტრს აღწევს.

ავტომობილს მოდერნიზებული მულტიმედიური სისტემა აქვს, რომელზეც მის შესახებ ყველანაირი ინფორმაციის მიღება შეიძლება. გარდა ამისა, 10-დუიმიან მონიტორზე შესაძლებელია სანავიგაციო მონაცემების გამოტანა. დაკიდევ, სისტემას საქარე შუშაზე ყველაზე მნიშვნელოვან ინფორმაციის პროექცირება შეუძლია. ეს კი იმითაა საინტერესო, რომ მძღოლს მუდმივად, გზისგან თვალის მოუწყვეტლად შეეძლება საჭირო ინფორმაციის მიღება.

სავარაუდოდ, ბავარიელები ამ კუპეს საწარმოო ვერსიის პრემიერას მერმისს, ჟენევის ავტო შოუზე მოაწყობენ.

”ლოტუს ელიტი” – ”ასტონ მარტინის” მომავალი კონკურენტი

BMW — Mon, 20 Sep 2010 19:23:34 GMT

პარიზის საავტომობილო შოუს გახსნამდე ორი კვირით ადრე და ამ ავტომობილის წარმოების დაწყებამდე სამნახევარი წლით ადრე, სპორტული ავტომობილების მწარმოებელმა ინგლისურმა კომპანია ”ლოტუსმა” თავისი ახალი ავტომობილის კონცეპტუალური ვერსიის შესახებ ინფორმაცია ინტერნეტით გაავრცელა.

პრეს რელიზში ნათქვამია, რომ ახალ ავტომობილს ”ელიტი” ეწოდება, რაც ირიბად იმის მიმანიშნებელია, რომ ”ლოტუსი” სუპერ ავტომობილების მწარმოებელთა ელიტარულ კასტას უბრუნდება. იქ კი, პირველ რიგში, კონკურენციას ”შინაური” ”ასტონ მარტინის” DB9-ს გაუწევს.

სხვათა შორის, სახელი ”ელიტი” ”ლოტუსისთვის” ახალი არაა. ინგლისურმა კომპანიამ ის ორჯერ - 50-იან და 70-იან წლებში გამოიყენა. ახლა კი, როდესაც საწარმოო პროგრამის გაფართოებაზე ზრუნავს, ეს სახელი ისევ გაიხსენა.

ახალ ”ელიტს” 2+2 ჩასაჯდომი ფორმულა აქვს, ანუ, მის სალონში ორი სრულფასოვანი სავარძელია და ორიც ისეთი, მასზე ბავშვიც ძლივს რომ მოთავსდება (ასეთი ჩასაჯდომი ფორმულა სპორტულ ავტომობილებში გავრცელებულია). კონცეპტუალური ავტომობილის სიგრძე 4.6 მეტრი, ჭონა კი 1680 კილოგრამია.

რაც მთავარია, ”ლოტუს ელიტი” ჰიბრიდული ძალური დანადგარით აღიჭურვება, რომელშიც მთავარი როლი ”ლექსუს LS 600h-სგან” აღებულ 5.0-ლიტრიან V8 ძრავს დაეკისრება. ეს ძრავი იაპონური ავტომობილის ანალოგისგან დამჭირხნით და მართვის სისტემით განსხვავდება. შიდაწვის ძრავის გარდა, ჰიბრიდულ სისტემაში ორი ელექტროძრავი და აკუმულატორების ბლოკიც გაერთიანდება.

აგრეგატის ჯამური სიმძლავრე 540 ცხენის ძალას მიაღწევს, მისი ტოპ ვერსიის სიმძლავრე კი 610 ცხენის ძალა იქნება. გარდა ამისა, ჰიბრიდულ სისტემაში კინეტიკური ენერგიის რეკუპერაციის სისტემაც (კერს-ი) შევა, რომელიც ”ლოტუსის” ინჟინრების მიერაა შემუშავებული. ეს სისტემა დამუხრუჭების დროს გამოყოფილ ენერგიას შეაგროვებს და მას აკუმულატორებში შეინახავს.

მართალია, ”ელიტის” საგზაო გამოცდები ჯერ არ დაწყებულა, თუმცა ”ლოტუსის” სპეციალისტები ვარაუდობენ, რომ ეს ავტომობილი ადგილიდან 100 კმ/სთ სიჩქარის აკრეფას დაახლოებით 3.5 წამში შეძლებს. ჯერჯერობით დაუზუსტებელია კონცეპტუალური ”ელიტის” მაქსიალური სიჩქარე. რაც შეეხება გამონაბოლქვში ნახშირორჟანგის შემცველობას, ის კილომეტრზე 215 გრამის ფარგლებში იქნება, რაც ასეთი ტემპერამენტიანი სპორტული ავტომობილისთვის ბევრი არაა.

ბრიტანეთის ბაზარზე, ჰიბრიდული აგრეგატით აღჭურვილი ”ლოტუს ელიტის” სავარაუდო ღირებულება 100 000 გირვანქა სტერლინგი იქნება, რაც კონკურენტი ”ასტონ მარტინ DB9-ს” ფასზე გაცილებით ცოტაა.

ევროპის წლის საუკეთესო ავტომობილის ნომინანტები

BMW — Mon, 20 Sep 2010 10:03:36 GMT

ორგანიზაცია ”ევროპის წლის საუკეთესო ავტომობილმა” დაასახელა ძველი კონტინენტის 2011 წლის საუკეთესო ავტომობილის წოდებაზე წარდგენილი 41 ახალი ავტომობილის ნომინანტთა სია, რომლებიდანაც კომპეტენტური ჟიური ყველაზე გამორჩეულს აარჩევს.

2 ნოემბერს ჩატარდება წინასწარი გამოკითხვა, რის შემდეგაც კონკურსს 7 საუკეთესო ავტომობილი შემორჩება. მეორე გამოკითხვა კი გამარჯვებულს გამოავლენს. თუმცა ამ გამოკითხვის შედეგები მხოლოდ 29 ნოემბერს გამოქვეყნდება.

ჟიურიში ევროპის 23 ქვეყნის 59 საავტომობილო გამოცემის ჟურნალისტი შედის. სხვადასხვა ქვეყანას ჟიურიში განსხვავებული რაოდენობით წარმომადგენელი ჰყავს. მათი რაოდენობა ქვეყნის ზომასა და გამოცემების პოპულარობაზეა დამოკიდებული. ჟიურიში ყველაზე მეტი, 6-6 წარმომადგენელი საფრანგეთს, გერმანიას, იტალიას, ესპანეთსა და რა თქმა უნდა, ბრიტანეთს ჰყავთ.

ალფა რომეო ჯულიეტა

აუდი A1

აუდი A7

აუდი A8

ბეემვე მე-5 სერია

ბეემვე X3

შევროლე სპარკი

სიტროენ C3/DS3

სიტროენ C4

დაჩია დასტერი

ფიატ დობლო

ფორდ C-მაქსი/გრანდ C-მაქსი

ჰონდა CR-Z

ჰიუნდაი ix20

ჰიუნდაი ix35

იაგუარ XJ

ჯიპ გრანდ ჩეროკი

კია სპორტიჯი

კია ვენგა

ლექსუს CT200h

მაზდა5

მერსედეს ბენც CLS

მინი ქანთრიმენი

მიცუბიში ASX

მიცუბიში i-MiEV/პეჟო iOn/სიტროენ C-ზერო

ნისან ჯუკი

ნისან ლიფი

ნისან მიკრა

ოპელ მერივა

პეჟო RCZ

პორშე კაიენი

რენო ფლუენსი

რენო ლატიტუდი

რენო უინდი

სააბ 9-5

სუზუკი კიზაში

სუზუკი სუიფტი

ფოლკსვაგენ პასატი

ფოლკსვაგენ ტუარეგი

ფოლკსვაგენ შარანი/სეატ ალჰამბრა

ვოლვო S60/V60

მყიდველს უფრო ძვირი ”შევროლე ვოლტი” ურჩევნია

BMW — Mon, 20 Sep 2010 10:03:15 GMT

მსოფლიოს საავტომობილო ისტორიაში მალე ახალი თავი დაიწყება - ბაზარზე სერიული ავტომობილების გაყიდვები დაიწყება. პიონერები ”ნისანი” და ”ჯენერალ მოტორსი” იქნებიან. პირველი სრულფასოვან ელექტრომობილ ”ლიფის” გაყიდვებს დაიწყებს, მეორე კი გაზრდილი სვლის მქონე ელექტრულ ჰიბრიდ ”შევროლე ვოლტს” გამოუშვებს. სხვადასხვა მცირე კომპანია ელექტრომობილებს ახლაც უშვებს, მაგრამ მათ სათვალავში იმიტომ არ ვიღებთ, რომ მათ ძალიან მცირე რაოდენობით აწარმოებენ და ამდენად, ბაზარზე ამინდის შექმნა არ შეუძლიათ.

ამიტომ, ახლა მთელი ავტოსამყაროს ყურადღება სწორედ ”შევროლე ვოლტისკენ” და ”ნისან ლიფისკენაა” მიპყრობილი. ბუნებრივია, ბევრ საავტომობილო გამოცემას აქვს ცდუნება, რომ ეს ორი ელექტრომობილი ერთმანეთს შეადაროს. . ასეთ გამოცემებს შორისაა ინტერნეტ ჟურნალი ”ავროივოლუშნ”, რომელმაც თავის მრავალრიცხოვან მკითხველს შორის, ჩაატარა გამოკითხვა, რომლის მიზანიც მარტივი იყო: მკითხველს თავისი ფავორიტი უნდა აერჩია.

ამ ორ ელექტრულ ავტომობილს შორის საკმაოდ დიდი განსხვავებაა. ”ნისან ლიფი” სრულფასოვანი ელექტრომობილია. ანუ, მას მხოლოდ ელექტროძრავი ამოძრავებს და ეს უკანასკნელი კი მხოლოდ აკუმულატორებში დაგროვილ ენერგიას იყენებს. მისი სვლის სიშორე 160 კილომეტრია. რაც მთავარია, პრაქტიკულად არ აქვს გამონაბოლქვი. ამ შემთხვევაში, მხედველობაში არ მიიღება ის, რომ ეს ელექტრომობილი შეიძლება თბოსადგურებში გამომუშავებულ ენერგიას იყენებდეს. ამგვარად, ირიბად მაინც აბინძურებს გარემოს.

გაცილებით მეტი სვლის სიშორე აქვს ”ვოლტს”. მართალია, მხოლოდ აკუმულატორებში დაგროვილი ენერგია მას მხოლოდ 64 კილომეტრის გასავლელად ჰყოფნის, მაგრამ როცა აკუმულატორები იცლება, საქმეში მცირელიტრაჟიანი შიდაწვის ძრავისა ელექტროგენერატორის ტანდემი ერთვება, რომელიც ელექტროძრავს ენერგიით ამარაგებს. ამგვარად, ”ვოლტის” სვლის სიშორე 483 კილომეტრამდე იზრდება. სამაგიეროდ, მას გამონაბოლქვი (თუნდაც უმნიშვნელო) აქვს.

დაკიდევ, ამ ორ ავტომობილს ფასებიც ძლიერ განასხვავებს: ”ნისან ლიფი” ამერიკაში 25 280 დოლარად უნდა გაიყიდოს, რაც ოდნავ მეტია პოპულარულ ჰიბრიდულ (ეგრეთ წოდებულ ლაით ჰიბრიდ) ”ტოიოტა პრიუსის” ფასზე. რაც შეეხება ”შევროლე ვოლტს”, ის 33 500 დლარი ეღირება. ამდენად, მოსალოდნელი იყო, რომ იაპონური მანქანა პოტენციურ მყიდველს უფრო მეტად მოხიბლავდა.

მაგრამ ასე არ მოხდა. გამოკითხულთა დაახლოებით 53 პროცენტი ”შევროლე ვოლტს” მიემხრო, 460 პროცენტზე მეტმა კი ”ნისან ლიფისადმი” სიმპატია გამოხატა. ერთი შეხედვით, ეს გასაკვირი უნდა იყოს, მაგრამ სპეციალისტებმა გამოკითხვის შედეგებს შემდეგი ახსნა მოუძებნეს: მათი აზრით, მყიდველი ჯერ მზად არაა იმისათვის, რომ შედარებით მცირე სვლის მქონე ავტომობილებზე გადაჯდს, როგორებიც მათ მხოლოდ ქალაქში მოძრაობისას გამოადგებათ. სპეცალისტები თვლიან, რომ სრულფასოვანი ელექტრომობილები უფრო მეტ პოპულარობას მას შემდეგ მოიპოვებენ, რაც მათი სვლის სიშორე საგრძნობლად გაიზრდება.

კომპანია ”ინრეკორმა” ახალი საავტომობილო მასალა შეიმუშავა

BMW — Mon, 20 Sep 2010 10:02:48 GMT

ბოლო 30 წელია, ავტომწარმოებლებს ორი მთავარი საზრუნავი აქვთ - ავტომობილების უსაფრთხოების უახლესი სისტემებით აღჭურვა და გამონაბოლქვზე არსებული მოთხოვნების შესრულება. ყოველივე ახალი სისტემებით ავტომობილების აღჭურვას მოითხოვს, რაც საბოლოო ჯამში, მათს დამძიმებას იწვევს. ამას კი შედეგად საწვავის ხარჯის ზრდა მოსდევს.
მაგრამ უახლოეს მომავალში, შესაძლოა, წონის ნამატის ერთდროულად შემცირება გახდეს შესაძლებელი. ამის საშუალებას კი ინგლისურ კომპანია ”ინრეკორის” გამოგონება იძლევა, რომელსაც ავტორებმა მარტივად, კომპანიის სახელივე უწოდეს. გამოგონება, ავტომობილის შასის კონსტრუქციაში სენდვიჩური ტიპის მასალის გამოყენებას ითვალისწინებს. სენდვიჩს კი ალუმინის ფურცლები და მათ შორის მოთავსებული მსუბუქი მასალა ქმნის. ეს მასალა პროპილენის ბაზაზე შექმნილი ქაფია (მისი სახელწოდებაა ARPRO).
ახალი მასალა ინრეკორი ძალიან მსუბუქი და თითქმის ისეთივე მტკიცეა, როგორიც ფოლადის კონსტრუქცია. სხვათა შორის, კარბონის კომპოზიტის სენდვიჩური კონსტრუქცია უკვე დიდი ხანია, ავიაინდუსტრიასა და ფორმულა 1-ის ავტომობილებში გამოიყენება და მან თავისი საიმედობა დიდი ხანია, საქმით დაამტკიცა. ამასთან, ინრეკორი კარბონის მასალაზე გაცილებით იაფიცაა და რაც არანაკლებ მნიშვნელოვანია, ის სრულად ექვემდებარება გადამუშავებას.

კომპანია ”ინრეკორი” აცხადებს, რომ მის მიერ შექმნილ ახალ მასალას, ავტომობილის წონის დაახლოებით 30 პროცენტით შემცირება შეუძლია. ეს კი ავტომობილის ეკონომიურობის გაუმჯობესებასაც გამოიწვევს და მას გარემოსადმი უფრო მეგობრულსაც გახდის.

რამდენადაც, ”ინრეკორის” მასალაში გამოიყენება ალუმინის ფურცლები, რომლებიც ტვიფვრით დამუშავებას ექვემდებარება, მასალა ინრეკორი მასობრივი წარმოებისთვისაც გამოსადეგია, რასაც ვერ ვიტყვით კარბონის კომპოზიტზე, რომელიც ვაკუუმურ დამუშავებასა და ფორმირებას მოითხოვს.

სხვათა შორის, ”ინრეკორმა” და კიდევ ერთმა ინგლისურმა კომპანია ”ჩესილ მოტორ კომპანიმ”, ახალი მასალით დაამზადეს ლეგენდარული ”პორშე 356 სპიდსტერის” კიტ კომპლექტი, რომელიც ჩვეულებრივი მასალებით შექმნილ ანალოგიურ ავტომობილზე დაახლოებით 15 პრიცენტით მსუბუქი გამოვიდა. გარდა ამისა, ”ინრეკორმა” ასევე შეიმუშავა ოთხადგილიანი ავტომობილის შასი, რომლის სავარაუდო წონაც, ფოლადის ელემენტების გამოყენების შემთხვევაში, დაახლოებით 300 კილოგრამი უნდა ყოფილიყო. მაგრამ ინრეკორით დამზადებული შასი მხოლოდ 160 კილოგრამს იწონის.

მათთვის, ვინც შეიძლება ამ მასალის უსაფრთხოებამ დააეჭვოს, კომპანია ”უორუიკ მენუფექტურინგმა” ჩაატარა გამოკვლევა, რომლის მიხედვითაც,, ინრეკორით შექმნილი ავტომობილები თავისუფლად მიიღებს ”ევრო NCAP-ის” ხუთ ვარსკვლავს. ესე იგი, ის სრულად შეესაბამება თანამედროვე, ძალიან მკაცრ ევროსტანდარტებს.

დაბოლოს, ”ინრეკორი” აცხადებს, რომ საკუთარ მასალას პირველ რიგში, თვითონვე გამოიყენებს. მაგრამ უფრო საინტერესო ისაა, რომ ინოვატორს უკვე გაფორმებული აქვს კონტრაქტი მსხვილ ავტომწარმოებელთან, რომლის სახელიც ჯერჯერობით არ მჟღავნდება.

”ნორსტერ 600R” - კვადროციკლი სპორტქარის თვისებებით

BMW — Fri, 17 Sep 2010 15:58:45 GMT

იყო დრო, როცა პატარა და ხელმისწვდომი ინგლისური სპორტული ავტომობილი, სახელად ”ოსტინ-ჰილი სპრაიტი” ბევრ ძვირადღირებულ კუპეს დინამიკური მახასიათებლების მხრივ, ტოლს არაფერში უდებდა. ამ მანქანას დახვეწილი გარეგნობა არ გამოარჩევდა, თუმცა გზებზე ყურადღებას მაინც იქცევდა. და, რა თქმა უნდა, ფანებიც ბლომად ჰყავდა.

მაგრამ გავიდა ათწლეულები და თავგამოდებული კოლექციონერების გარდა, ეს ავტომობილი არავის გახსენებია. თუმცა, ამ ნაკლის გამოსწორებას ფინური კომპანია ”ნორსტერი” ცდილობს, რომლის ინჟინრებმაც კვადროციკლის ტიპის შასიზე, რომელსაც ძრავი ბაზაში აქვს განლაგებული, ნამდვილი სპორტული კუპე შექმნეს, სახელად ”ნორსტერ 600R”. თუნდაც, ჯუჯა ზომებით, მაგრამ ეს არის სპორტული ავტომობილი, რომელსაც მძღოლისთვის დიდი სიამოვნების მინიჭება შეუძლია.

”ნორსტერ 600R” ფინეთში შეიმუშავეს, მაგრამ მას ჩინეთში უშვებენ. ეს კი იმისათვის კეთდება, რომ ”ოსტინ-ჰილის” ტრადიცია გაგრძელდეს და ორადგილიანი ავტომობილი ხელმისაწვდომი იყოს. დაკიდევ, ამ ავტყომობილის მართვა მძღოლის სტანდარტული ლიცენზიითაც შესაძლებელია.

ევროკავშირის ფარგლებში, ”ნორსტერ 600R” დარეგისტრირებულია, როგორც კვადროციკლი, თუმცა მისი მართვა ზუსტად ისევე ხდება, როგორც ჩვეულებრივი ავტომობილისა - საჭის რგოლით. ავტომობილის მზიდი ტანი ფოლადის მილებისგან შეკრულ ჩაჩოს წარმოადგენს, რომელზეც შუშის ბოჭკოს კომპოზიტისგან დამზადებული ძარაა დამაგრებული. კარებები ”ლამბორგინის” სტილში, ქვევიდან ზევით და უკნიდან წინ იხსნება.

ინტერნეტ გამოცემა ”ავტობლოგის” ინფორმაციით, ”ნორსტერ 600R” ჩინურ კომპანია ”ჩერის” მოდელ ”აცტეკოს” 580-კუბურსანტიმეტრიანი ძრავითაა აღჭურვილი, რომელიც ძრავის მუხლა ლილვის 5 500 ბრ/წთ-ზე მაქსიმუმ 34 ცხენის ძალას იძლევა. ძრავს ორი ცილინდრი და ამდენივე გამანაწილებელი ლილვი აქვს, მის ყოველ ცილინდრს კი ოთხი სარქველი ემსახურება. ძრავთან 5-საფეხურიანი გადაცემათა კოლოფია შეწყვილებული. მათი წყალობით, ”ნორსტერ 600R” გამონაბოლქვზე ევრო-4 ნორმას აკმაყოფილებს.

”ნორსტერ 600R” სულ რაღაც 520 კილოგრამს იწონის, სუსტი ძრავი კი საკმარისია იმისათვის, რომ მაქსიმალური სიჩქარე 90 კმ/სთ იყოს. მეტს ეს ძრავი ვერ ერევა. სამაგიეროდ, 100 კილომეტრის გასავლელად ის მხოლოდ 5 ლიტრ ბენზინს მოიხმარს.

”ასტონ მარტინმა” უგზოობის ”ლაგონდაზე” უარი თქვა

BMW — Fri, 17 Sep 2010 15:56:45 GMT

ეს მოსალოდნელი იყო - ”ასტონ მარტინმა” უარი თქვა უგზოობის მოდელ ”ლაგონდას” წარმოებაზე, რომლის კონცეპტუალური ვერსიაც შარშან, ჟენევის მოტორ შოუზე გვიჩვენა. ამ ავტომობილს საზოგადოების და ჟურნლისტების მხრიდან, საშინელი გამოხმაურება ჰქონდა, თუმცა ამის მიუხედავად, ინგლისური კომპანია მაინც აპირებდა მისი წარმოების დაწყებას. და მაინც, საბოლოო გადაწყვეტილება უარყოფითი გამოდგა - უგზოობის ”ლაგონდას” (სურათზე) სერიული ვარიანტი დღის სინათლეს ვერ იხილავს.

თუმცა, ეს სულაც არ ნიშნავს იმას, რომ ”ასტონმა” მარკა ”ლაგონდას” აღდგენზე უარი თქვა. პირიქით, კომპანიას ამ სახელთან დაკავშირებით დიდი გეგმები აქვს. ადრე თუ გვიან, ამ მარკით ავტომობილების გაყიდვა აუცილებლად დაიწყება, თუმცა სანამ ეს მოხდება, ”ასტონში” ბაზრის რეაქციის პროგნოზირებას ცდილობენ.

და არც უგზოობის ”ლაგონდას” პროექტი დაიდება მთლიანად თაროზე - ”ასტონ მარტინი” ამ პროექტის საუკეთესო თვისებებს, მათ შორის, დიზაინის ზოგიერთ ელემენტს სედანსა და უნივერსალზე გამოიყენებს. არადა, სწორედ ზედმეტად უხეში დიზაინი იყო იმის მიზეზი, რომ საზოგადოებამ უგზოობის კონცეპტუალური ”ლაგონდა” დაიწუნა.

ახალი ”ლაგონდა” ”ასტონ მარტინის” ოთხკარიან კუპე ”რეპიდის” პლატფორმას დაეყრდნობა. ამ ეტაპზე, ახალი პროექტი შემუშავების ადრეულ სტადიაში იმყოფება და მასზე რაიმე კონკრეტულის თქმა შეუძლებელია. ერთადერთი, რისი თქმაც ახლა ჭორის დონეზე შეიძლება ისაა, რომ ”ასტონ მარტინი” სედან ”ლაგონდას” 2014 წელს გამოუშვებს.

მართალია, ორივე ავტომობილს მსგავსი მონაცემები ექნება, მაგრამ სედანი ”ლაგონდა” თავის ”უფროს ნთესავს” მყიდველს სულაც არ წაართმევს. ამის მიზეზი კი შემდეგია: ”რეპიდს” ერთი მინუსი აქვს - მისი სალონის უკანა სავარძლების მგზავრებისთვის სივრცე ძლიერ შეზღუდულია. ”ლაგონდას” პროექტირებისას კი ამ ნაკლის გამოსწორებას ეცდებიან. შესაბამისად, ამ ავტომობილებს მნიშვნელოვნად განსხვავებული გარეგნობაც ექნება...

”ვენუჩია” - ახალი ჩინურ-იაპონური საავტომობილო ალიანსი

BMW — Fri, 17 Sep 2010 15:56:07 GMT

იაპონურმა საავტომობილო გიგანტმა ”ნისანმა” და ჩინურმა ”დონფენმა” სრულიად ახალი ბრენდი ჩამოაყალიბეს, სახელად ”ვენუჩია”, ანუ ჩინურად ”ქი ჩენი”, რომელიც ადგილობრივ ბაზარზე იმუშავებს და რომლის პრემიერაც 2012 წელს ჩატარდება.

”დონფენი” აქამდე ”ნისანის” ლიცენზიით აწარმოებს ავტომობილებს. ამიერიდან კი ისინი ერთობლივადაც იმუშავებენ, რაც მათი პროდუქციის ხარისხსა და ფასზეც დადებითად აისახება. თუ გავითვალისწინებთ იმ ფაქტსაც, რომ ”ნისანი” ფრანგულ ”რენოსთანა” ალიანსში, შეიძლება ითქვას, რომ ახალი ბრენდი სამი დიდი კომპანიის შვილობილია.

ჯერჯერობით უცნობია გარიგების პირობები. ამ ეტაპზე, ერთობლივ კომპანიაში თითზე ჩამოსათვლელი ადამიანები მუშაობენ, თუმცა მისი გახსნის დროს, ”ვენუჩიას” ათასობით თანმშრომელი ეყოლება. აქ იქნებიან სხვადასხვა სფეროს მკვლევარები, დიზაინერები, ინჟინრები, ტექნლოგები, მარკეტოლოგები, გაყიდვების მენეჯერები და ყველა ის ადამიანი, რომლების ცოდნაც სრულფასოვან საავტომობილო კომპანიას ესაჭიროება.

”ვიმედოვნებთ, რომ მომავალში, წლიურად მილიონზე მეტი ავტომობილის გაყიდვას შევძლებთ, ჩვენი ახალი ბრენდი მყიდველს პრაქტიკულ ავტომობილებს შესთავაზებს, რომლებსაც თავიანთი კლასისთვის უმაღლესი ხარისხი ექნებათ”, - ამბობს ”დონფენ ნისანის” მმართველი დირექტორი ფუმიაკი მაცუმოტო.

ჯერჯერობით, არც ის გამოცხადებულა, თუ რომელ მოდელებს გამოუშვებს ახალი კომპანია. სამაგიეროდ, ”ნისანი” ახალი ბრენდის სახელწოდებასა და ლოგოს განმარტავს. მაგალითად, სახელი ”ვენუჩია” რომაულ ქალღმერთ ვენერასგან (ვენუს) ისესხეს, ლოგო კი ხუთი ვარსკვლავის კომბინაციაა. ისინი იმ ხუთ პირობას აღნიშნავენ, რომლებიც პარტნიორმა ავტომწარმოებლებმა, ახალი კომპანიის დაფუძნებისას დადეს. ესენია: მომხმარებელთა პატივისცემა, ფასეულობის შექმნა, საუკეთესოს წარმოება, მსოფლიოს დონის ხარისხის მიღწევა და ოცნების მიღწევა.

რა ოცნება აქვს ორ კომპანიას, ეს მათ არ განუმარტავთ, თუმცა ბევრი მარჩიელობა არ უნდა იმას, რომ უმთავრესი მიზანი, მსოფლიოს უკვე უდიდესი, ჩინური ავტო ბაზრის სოლიდური წილის დაუფლება იქნება. უფრო მეტს კი მომავალი გვიჩვენებს...

”ლამბორგინი ჯოტა” პარიზული პრემიერის წინ

BMW — Fri, 17 Sep 2010 15:46:21 GMT

ცოტაც და საავტომობილო სამყაროს ცენტრი პარიზში გადაინაცვლებს, სადაც დდ საავტომობილო შოუ გაიმართება. ბევრი ავტომწარმოებელი ამ მოვლენისთვის არაერთ საინტერესო სიახლეს ამზადებს. და, რა თქმა უნდა, შოუს ბევრი ვარსკვლავი ეყოლება, რომელთა შორისაც, ერთ-ერთ ყველაზე გამორჩეულს ”ლამბორგინის” პავილიონში ნახავთ.

როგორც იტალიური კომპანია აცხადებს, ეს იქნება საუკეთესო ავტომობილი მის სახელოვან ისტორიაში. ავტომობილს სახელად ”ჯოტა” ერქმევა და ის ჯერაც ბევრისთვის სასურველ, თუმცა კონკურენტული გარემოსათვის მეტისმეტად დრომოჭმულ ”მურსიელაგოს” შეცვლის.

ჯერჯერობით, თავისი ახალი ავტომობილის შესახებ, ”ხარებს” ჯერ ტექნიკური ინფორმაცია არ გაუვრცელებიათ. ინტერნეტში გამოჩნდა მხოლოდ ახალი ავტომობილის ფოტო-ტიზერი (სურათზე), რომელიც პრაქტიკულად არაფრის მეტყველია. ინტერნეტშივე ახალი ”ლამბოს” შესახებ, ორის დონეზე, გარკვეული ინფორმაცია მაინც ცირკულირებს.

ამ ჭორების მიხედვით: ”ჯოტა” აღიჭურვება 6.0-ლიტრიანი V12 ძრავით, რომლის სავარაუდო მაქსიმალური სიმძლავრე 700-800 ცხენის ძალა იქნება. მაქსიმალური სიჩქარე 354 კმ/სთ-ს მიაღწევს, ადგილიდან 100 კმ/სთ-მდე აჩქარებას დაახლოებით 3 წამი დასჭირდება. რაც შეეხება საწვავის ხარჯს, ის 100 კილომეტრზე 10 ლიტრზე ნაკლები არ იქნება.

”ჯოტას” ტანი ალუმინისა და კარბონის კომპოზიტისგანაა დამზადებული. შედეგად, ავტომობილის წონ 1 396 კილოგრამს მიაღწევს. წონის და ძრავის სიმძლავრის ასეთი დაბალი ფარდობა კი ავტომობილის შესანიშნავ მაენვრულობას უზრუნველყოფს.

სავარაუდოდ, ”ლამბორგინი” ”ჯოტას” გაყიდვას მერმისს დაიწყებს.

”მერსედესმა” A-კლასის ელექტრომობილ E-სელის წარმოება დაიწყო

BMW — Fri, 17 Sep 2010 15:45:31 GMT

”მერსედეს ბენცი” თავისი ძირითადი მოდელების ბაზაზე, ელექტრომობილების გამოშვებას აგრძელებს. ”სმარტის”, B-კლასის და ”ვიტოს” შემდეგ, ამჯერად A-კლასის ჰეჩბეკის ჯერიც დადგა. ”A-კლას E-სელის” მსოფლიო პრემიერა პარიზის საავტომობილო შოუზე გაიმართება, მისი წარმოება კი გერმანულმა კომპანიამ ქალაქ რაშტატის ქარხანაში უკვე დაიწყო. პარიზულ პრემიერამდე ორი კვირით ადრე კი, ”მერსედესმა” თავისი ახალი ელექტრომობილის ფოტოები და ტექნიკური მონაცემები გაავრცელა.

ავტომობილი ლითიუმ-იონური აკუმულატორების ორი ბლოკითაა აღჭურვილი, რომელთა ჯამური ენერგოტევადობა 36 კილოვატია საათში. ეს ენერგია კი საკმარისია იმისათვის, რომ ავტომობილმა შეუჩერებლად 200 კილომეტრზე მეტი გაიაროს. E-სელს მამოძრავებელ ძალას მუდმივ დენზე მომუშავე სინქრონული ელექტროძრავი ანიჭებს, რომლის პიკური სიმძლავრე 95 ცხენის ძალას (70 კილოვატს) აღწევს, ნომინალური სიმძლავრე კი მხოლოდ 68 ცხენის ძალაა (50 კვტ). მაქსიმალური მაბრუნი მომენტი 290 ნიუტონმეტრია.

ამ აგრეგატის დახმარებით, ელექტრომობილი ადგილიდან 100 კმ/სთ სიჩქარის აკრეფას 5.5 წამში ასწრებს. მაქსიმალურ სიჩქარეს კი ელექტრონული სისტემა, 150 კმ/სთ ნიშნულით ზღუდავს.

სალონის ცენტრალურ ნაწილში მოთავსებულია მრავალფუნქციური მონიტორი, რომელზეც ავტომობილის სხვადასხვა ოპერატიული მონაცემის ნახვაა შესაძლებელი. პირველ რიგში, ესაა აკუმულატორებში დარჩენილი ენერგიის მარაგის დონე, მგზავრობის პარამეტრები - კერძოდ, მოძრაობის დრო და გავლილი მანძილი, საშუალო სიჩქარე და ენერგიის საშუალო მოხმარება, ასევე აკუმულატორებში დარჩენილი ენერგიის რაოდენობა.

ისევე, როგორც ”მერსედესის” სხვა ავტომობილებს, ამ ელექტრომობილსაც კომპლექტაციის რამდენიმე დონე აქვს. მათგან ყველაზე უკეთ დაკომპლექტებულია ”ავანგარდი”, რომლის პაკეტშიც შედის ბი-ქსენონის მთავარი ფარები, ავტომატურიპარკირების სისტემა ”ექტივ პარკ ესისტი” და ავტომატური კლიმატ კონტროლის სისტემა ”თერმოტრონიკი”.

რა თქმა უნდა, ავტომობილი უსაფრთხოების თანამედროვე სისტემებითაა აღჭურვილი, რომელთა შორისაცაა გვერდითა და უკანა შუშების უსაფრთხოების ბალიშები და ერგონომიული სავარძლები.

შტუტგარტელები მხოლოდ 500 ცალი E-სელის წარმოებას აპირებს. მათი გაყიდვისთვის კი ლიზინგის პრინციპს გამოიყენებენ. ამასთან, ელექტრომობილს წინასწარ შერჩეული მყიდველი მიიღებს. ავტომობილი მხოლოდ გერმანიის, საფრანგეთისა და ჰოლანდიის ბაზრებზე გაიყიდება.

”სუბარუ იმპრეზა ბერლინეტა” - ჯერ მხოლოდ სტუდიური კონცეპცია

BMW — Sat, 19 Jun 2010 10:31:24 GMT

დიდი ხანია, ”სუბარუს” ფანები იმედოვნებენ და ლოცულობენ, რომ იაპონურმა კომპანიამ სპორტული კუპეს წარმოება დაიწყოს, მაგრამ ჯერჯერობით, მათი ოცნება ჰაერშია გამოკიდებული. მას შემდეგ კი, რაც ”სუბარუ” ”ტოიოტას” პარტნიორი გახდა, გაჩნდა იმედი, რომ ბოლოს და ბოლოს, მოსახდენი მოხდებოდა.

დღეს უკვე შეიძლება ითქვას, რომ მალე ”სუბარუ” აუცილებლად დაიწყებს ”ტოიოტას” FT-86-ის მისეული ვერსიის წარმოებას. მაგრამ როგორი გარეგნობა ექნება ”სუბარუსეულ” სპორტსმენს? ამის თაობაზე, ჯერ მხოლოდ მარჩიელობა შეიძლება. თუმცა, იტალიურმა სადიზაინერო ფირმა ”ბეესტუდიამ” მარჩიელობას საქმის კეთება ამჯობინა და სპორტული ”სუბარუს” მისეული, მეტად საინტერესო ხედვა შემოგვთავაზა.

ესაა ”სუბარუ იმპრეზა ბერლინეტა”, ორადგილიანი კუპე, რომელიც მისი ავტორების ჩანაფიქრით, ”იმპრეზა STI-ის” ბაზაზე უნდა შეიქმნას. მაგრამ ისინი მნიშვნელოვან ცვლილებას ითვალისწინებენ - მათ ავტომობილზე ძრავი ბაზაში მოთავსდება და თუ ”იმპრეზაზე” წინა ცილინდრები ავტომობილის წინა მხარესაა მიქცეული, კონცეპტუალურ მოდელზე (რომელიც ჯერ მხოლოდ კომპიუტერით შემუშავებული ესკიზების სახით არსებობს) წინა ცილინდრები უკან ”გაიხედავენ”. ანუ ძალური დანადგარები (ძრავი და ტრანსმისია) 180 გრადუსით მობრუნდება.
”ბეესტუდიოს” განცხადებით, მათი ”ბერლინეტა” ფოლადის ოთხკუთხა მილებისგან შეკრულ სივრცობრივ ჩარჩოზე აიგება, ძარის ნაწილები კი შუშის ბოჭკოს კომპოზიტისგან დამზადდება. შესაძლებელია შასის ალუმინის ფურცლებისგან შეკვრა, ძარის კი კარბონის კომპოზიტისგან დამზადება, რაც ავტომობილს მნიშვნელოვნად შეამსუბუქებს.

საუდელები უგზოობის ავტომობილს გამოუშვებენ

BMW — Sat, 19 Jun 2010 10:29:38 GMT

ჟენევის წლევანდელ საავტომობილო შოუს ერთ-ერთი ვარსკვლავი უგზოობის კონცეპტუალური ავტომობილი, სახელად ”გაზალ 1” იყო, რომელიც საუდის არაბეთში შეიქმნა. მაშინ არავინ იცოდა, რა ბედი ელოდა ამ ორიგინალურ ავტომობილს. მაგრამ გავიდა სამი თვე და საუდის არაბეთის მეფე აბდულამ, სპეციალურად მოწვეულ პრესკონფერენციაზე განაცხადა, რომ ”გაზალ 1” კონვეიერზე დადგება.

”გაზალ 1-ის” შექმნაში, ერ რიადის უნივერსიტეტის სტუდენტების გარდა, მონაწილეობა ავსტრიულ კომპანია ”მაგნა შტეირის” სპეციალისტებმაც მიიღეს. მართალია, ავტომობილი გარეგნულად ”ტოიოტას” უგზოობის ”FJ კრუიზერს” ჰგავს, მაგრამ ის სულ სხვა ავტომობილის - ”მერსედეს ბენცის” G--კლასის უგზოობის მოდელის პლატფორმაზეა აგებული და V8 ძრავითაა აღჭურვილი.
გამოცემა ”არაბ ნიუსთან” საუბრისას, ”გაზალ 1-ის” შემქმნელებმა განაცხადეს, რომ ეს ავტომობილი საუდის არაბეთის და მისი მეზობელი ქვეყნების უმკაცრესი კლიმატური პირობების შესაბამისადაა შექმნილი. სავარაუდოდ, არაბულ ავტომობილს ”მაგნა შტეირის” ავსტრიული საწარმო გამოუშვებს. წლიურად კი სულ 20 000 ცალი ”გაზალ 1-ის” წარმოებაა დაგეგმილი.

ჩინელები ელექტრომობილების პროპაგანდას იწყებენ

BMW — Sat, 19 Jun 2010 10:26:43 GMT

ჩინეთის მთავრობა ახალ ეკოლოგიურ კამპანიას იწყებს, რომლის მიზანიც, ქვეყანაში ეკოლოგიური მდგომარეობის გაუმჯობესება და ეკოლოგიურად სუფთა - ჰიბრიდული და ელექტრული ავტომობილების პროპაგანდა-პოპულარიზაციაა. კამპანია ჯერჯერობით პილოტურ ეტაპზეა და მხოლოდ ხუთ ქალაქს შეეხება, თუმცა სავარაუდოდ, ის მალე მთელს ქვეყანაზეც გავრცელდება.

როგორც საავტომობილო ბიზნესის მიმომხილველები ვარაუდობენ, ჩინეთის მთავრობას ამ წამოწყებისთვის სულ სხვა საბაბი აქვს - ესაა ადგილობრივი ავტომწარმოებლებისთვის განვითარებაში ხელის შეწყობა და მათთვის სტიმულის მიცემა იმისათვის, რომ თავიანთ უცხოელ პარტნიორებთან ერთად, ეკოლოგიურად სუფთა ტრანსპორტი განავითარონ.

მოსალოდნელი იყო, რომ პროგრამაში მონაწილე ხუთ ქალაქს შორის, ადგილი პეკინისთვისაც გამოიძებნებოდა - ამ ქალაქს მსოფლიოში ერთ-ერთი ყველაზე მეტად დაბინძურებული ჰაერი აქვს. მაგრამ პეკინი სიაში ვერ მოხვდა, რასაც მარტივი მიზეზი აქვს - ხუთეულში ის ქალაქები შეიტანეს, სადაც 6 ყველაზე დიდი ჩინური ავტოკომპანიის შტაბ-ბინა მდებარეობს, რომლებსაც ჰიბრიდული და ელექტრული ავტომობილების წარმოების გამოცდილება აქვთ.

ჩინეთის მთავრობის პილოტური პროგრამის მიხედვით, ჰიბრიდული ავტომობილების მყიდველებისთვის, სუბსიდიის სახით, 50 000 იუანია ($7 321) გათვალისწინებული, ელექტრომობილების მყიდველები კი მთავრობისგან ჯილდოს სახით 60 000 იუანს ($8,785) მიიღებენ. ამასთან, ხუთივე ქალაქი ვალდებულია, რომ თავის ფარგლებში, აკუმულატორების დასამუხტი სადგურების და ნახმარი აკუმულატორების მიღება-გადამუშავების სადგურების ქსელი შექმნას.

სხვათა შორის, ეს ქალაქები ეკოლოგიურად სუფთა ავტომობილების მყიდველებს, თავადაც უწესებენ შეღავათებს. მაგალითად, ქალაქ შენჯენში, ჰიბრიდული და ელექტრული ავტომობილების მყიდველებს, შეღავათად 20 000 იუანი ($2 928) დაუწესდათ. ყველაფერი ეს აშკარას ხდის, რომ ის კომპანიები, რომლებიც ჩინეთში ჰიბრიდულ და ელექტრულ ავტომობილებს შეიტანენ, სოლიდური შეღავათებით ისარგებლებენ.

პილოტურ პროგრამაში შემდეგი ქალაქები მონაწილეობენ: შანჰაი, ჩანჩუნი, შენჯენი, ჰანჯოუ და ჰეფეი. სწორედ ამ ქალაქებში მდებარეობს 6 უდიდესი ჩინური საავტომობილო კომპანიის მთავარი ოფისები. ეს კომპანიებია: შანჰაი ავტომოტივ ინდასტრი კორპორეიშნი (SAIC) - რა თქმა უნდა, შაჰნაიში, FAW ჯგუფი - ქალაქ ჩანჩუნში, BYD ავტოს შტაბ-ბინა შენჯენში მდებარეობს, ”ჩერი ავტომობილისა” - ფეჰეის გარეუბან ვუჰუში, ”ჯეძიან ჯილი ჰოლდინგ” ჯგუფი და ”ზოიტ” ჯგუფი კი - ჰანჯოუში.

საინტერესოა, რომ ამ კომპანიებს, ჩინეთის ტერიტორიაზე გამართულ საავტომობილო გამოფენებზე, არაერთი ჰიბრიდული და ელექტრული კონცეპტუალური მოდელი აქვთ ნაჩვენები, რაც იმას ნიშნავს, რომ ისინი მათ წარმოებას მალე დაიწყებენ. უფრო მეტიც, ყველას ქვეყნის და აღნიშნული ქალაქების მთავრობებთან ახლო საქმიანი და პარტნიორული ურთიერთობა აქვთ. მაგალითად, BYD-მა ახლახანს გამოაცხადა, რომ ასეულობით ელექტრომობილ e6-ს (სურათზე) ქალაქ შენჯენის ტაქსის პარკისთვის დაამზადებს. ანალოგიური მოქმედება სხვა კომპანიების მხრიდანაცაა მოსალოდნელი.

ამ კომპანიების გარდა, სამთავრობო, თუნდაც საპილოტო პროგრამაში კიდევ რამდენიმე ჩინური კომპანია და მათი ქალაქი ვერ მოხვდა. მათგან ყველაზე დიდებია ”ჩანგან ავტომობილი” (ქალაქი ჩონპინი) და ”ბეიძინ ავტომოტივ ინდასტრი ჰოლდინგი” (იგივე BAIC, ქალაქი პეკინი).

”ჩანგანი” ფულს არ იშურებს ახალი ტექნოლოგიების შემუშავებასა და შეძენაში. მისი სპეციალისტები ჰიბრიდებზე, პლაგ-ინ ჰიბრიდებზე, ელექტრომობილებსა და ფიჭურ საწვავზე მომუშავე ტექნოლოგიებზე მუშაობენ. მაგრამ აქამდე ამ კომპანიას ბაზარზე თითქმის არ აქვს პლაგ-ინ ჰიბრიდული და ელექტრული ავტომობილები. იგივე სიტუაციაშია ”ბეიძინ ავტომოტივიც”, რომელმაც პეკინის გამოფენაზე პლაგ-ინ ჰიბრიდული და ელექტრული კონცეპტუალური მოდელები კი წარადგინა, მაგრამ მათი წარმოების დაწყებას აგვიანებს. ამიტომაც, ისინი პილოტურ პროგრამაში არ დაუშვეს.

ამ პილოტურ პროგრამას კიდევ ერთი დადებითი თვისება აქვს: ადგილობრივმა კომპანიებმა კარგად გაიგეს, თუ რა მიმართულებით უნდა განახორციელონ ინვესტიციები, რომ მაქსიმალური მოგება მიიღონ და ამ ინვესტიციებმა მათი სწრაფი განვითარება უზრუნველყოს. არადა, ადრე არავინ იცოდა, ქვეყნის მთავრობა რომელ ტექნოლოგიებს მიანიჭებდა უპირატესობას - პლაგ-ინ ჰიბრიდებისას, ელექტრომობილებისას, თუ ფიჭური უჯრედებისას. ახლა აშკარად გაირკვა - ფიჭურ საწვავებს ჩინეთში არ სწყალობენ და აქედან გამომდინარე, შესაბამისი ტექნოლოგიების განვითარებას მომავალი არ აქვს. არადა, SAIC-ს ფიჭური ელემენტების შემუშავებაზე, არაერთი ათეული მილიონი დოლარი აქვს დახარჯული...

BMW X1 უმცროსი ძმა x3-ის

BMW — Wed, 16 Jun 2010 05:08:16 GMT

ყველაზე ძლიერი ვერსია გამოვლინდა xDrive28i 3.0 კუბატურიანი 6 ცილინდრიანი, ის 100კმ ფარას 6.7 წამშI. მაქსიმალური სიჩქარე 240კმ.

პირველი ჯიპი BMW-სი გამვოლინდა 10 წლის უკან, ეს იყო X5. ეხლა კიდე გამოვლინდა 2 თაობის კროსვერი. 2003 წლიდან BMW-ჯიპები უფრო შეემატა, ეს 2-ჯიპი გახლავთ x3. მაგისშ ემდეგ სპორუტლი ულტიმატუმით გამოჩნდა ახალი და შესანიშნავი დიზაინის, აეროდინამიკის, სპორტის, BMW X1. ყელაზე პატარა მოდელი BMW-ეს ჯიპებში...

როცა "იქსერთი" აცხოვრებდნენ კონცეპტში, მაგიშ შეუდარებელი დიზაინი გავს ახალი თაობის 7-სერიას. სერიული x1, თეთრი ფერით და დიდი ბრობლებზე გამოიყურება :შესანიშნავად". ხოლო სალონი ტორეპდო ცოტათI შებრუნებული შოფერთან, (ეგეთივ არიანტი სხვათაშორის ე30 ე36 ე34 და სხვა მოდელებზე იყო და ძალიან კარგი იყო) ძალიან კარგი და ლამაზი გამოდგა....

4x4 წამყვანი თვლები ტრანსმისია 30:70.... უკანათვლებისთვის უზრუნველყოფილია ბლოკირებული ხიდი, თუ გინდათ ეკონომია, თქვეთვის ბავარია გთავაზობს კიდევაც უკანა თვლებიან x1 (ანუ კიდევაც იქნება xdrive ასევე idrive)

როგორ ვიდი ექნება შიგნიდან მანქნაა, როცა გზას ვუყურებთ, ჩვენთვის ჯერ ცნობილი არ არის. უკანა დასაჯდომზე 4 კაცი უნდა დაეტიოს უპრობლემოდ. ეს ახალი ჯიპი გამოსულია 3-სერიის ბაზაზე (ანუ აწყობილი) 4 თვლებიან უნივერსალი 3-სერიის. (ბორბლების ბაზა 2760 მმ) ასევე გვანახეს სქემა პადვესკის McPherson წინა და и многорычажкой сзади.

ინტერიერს რაც სეეხება, ეს არის ლიდერი თავისი ინტერიერით თავის კლასში. ანუ მხოლოდ კონკურენცია შეუძლიე გაუწიოს audi q3.

გაბარიტი X1 როგორც ტიპიური კომპაქტური კროსვერი. სიგრძეში ახალი BMW მსგავისა მიახლოებით Volkswagen Tiguan 93 მმ (4520) მაგრამ ჩამორჩება მაგას, სიგრძეში და სიმაღლეში 16 მ (1793) და 140 (1543).

საბარგულში შედის 420-450 ლ. ხოლო თუ გადავწიეთ სიდენიები თავისუფლად შედის 1350 ლ.

მაგრამ რაც ჩვენთვის არის Mთავარი ეს BMW-ძრავი, და ამ საქმეში ეს ბრენი არის ლიდერი ყოველთვის (და იქნება). ახალი ძრავები: 3 ბენზინის, 2 ოთხცილინდრიანი 2.0 (143 დან 170 ცხენი) 6 ცილინდრიანი 3.0 კუბატურით (265 ცხენის ძალა) და +3 დიზელის ძრავი. 2-ივე დიზელის ძრავები არის 2.0 კუბატურიანი და ტურბო დიზელზე. რომელბსაც აქვს 143, 177 და 204 л.с ხოლო აჩქარება აქვს 204 ცხენის ძალიან 23d-ს 7.4 წამი.

მაგალითად Volkswagen Tiguan აქვს Дорожный просве 200მმ, ხოლო BMW X1 203 მმ.

ოფირციალური გახსნა BMW X1 გამოვა სექტემბერში ფრანფრუქტში. ხოლო გაყიდვები შეიძლება დაიწყოს ფრანფრუკტამდეც. აი ამერიკელებს არ გაუმართლათ, ამერიკელები ამ ახალ მოდელს იხიალვენ 1 წელში, მიახლეობით 2010 დასაწყიში...

ჩემგან დავამატებ: ეს იქნება ძალიან ლამაზი, სპორტული, მანვერირებული, კარგი აეროდინამიკური, და სწრაფი კროსვერი თავის კლასში (მაგრად შემიყვარდა ეს მოდელი)!!!

P.S FISH მა მთხოვა მაგ ტრაკმა

”სააბი” და ”ბეემვე” პარტნიორობას აპირებენ

BMW — Tue, 15 Jun 2010 16:52:14 GMT

სააგენტო ბლუმბერგი გვამცნობს, რომ ავტომობილების მწარმოებელი შვედური კომპანია ”სააბი” მოლაპარაკებას გერმანულ ”ბეემვესთან” აწარმოებს. მოლაპარაკების თემა ტექნოლოგიების და მაკომპლექტებლების გაცვკლას ეხება, ეს კი ”სააბს” ახალი, კომპაქტური ავტომობილის წარმოებისთვის ესაჭიროება.

კომპაქტური ”სააბის” კონცეპტუალური ესკიზი

..........................................

თუ მხარეები პარტნიორობის დაწყებას გადაწყვეტენ, ”ბეემვე” ”სააბს” ძრავებს და ტრანსმისიებს მიაწვდის. რაც მთავარია, შვედურ კომპანიას, ბავარიელთა პლატფორმების გამოყენების საშუალება მიეცემა. ეს ინფორმაცია ბლუმბერგს მოლაპარაკებაში მონაწილე ორმა პიროვნებამ მიაწოდა, რომლებმაც ვინაობის გამხელა არ ისურვეს.

მათი განცხადებით, მოლაპარაკება ჯერ მხოლოდ ადრეულ სტადიაშია და ის არაოფიციალურ სტატუსს ატარებს. მოსალოდნელია, რომ მხარეები შეთანხმებამდე ორ თვეში მივლენ. შვედურ მხარეს ძლიერი პარტნიორი იმისათვის სჭირდება, რომ კომპაქტური მოდელის შემუშავებას აპირებს, რომლის შესაფერისი პკატფორმა და აგრეგატები მას არ გააჩნია. ”ბეემვეს” კი ”მინის” სახით, შესანიშნავი ბაზა აქვთ.

სააბ 92

..........................................

სხვათა შორის, კომპაქტურ ავტომობილს (სააბ 92) შვედური კომპანია 1950-იან წლებში აწარმოებდა. მაგრამ დიდი ხანია, ”სააბმა” ეს სეგმენტი დატოვა და ახლა იქ დაბრუნებას აპირებს. ეს კი ”სააბის” ახალი მფლობელის, ჰოლანდიურ კომპანია ”სპაიკერის” წამოწყებაა, რომელსაც მიზნად შვედური კომპანიის გამოცოცხლება აქვს დასახული.

”სპაიკერმა” ”სააბი” თებერვალში გამოისყიდა ”ჯენერალ მოტორსისგან”, ბოლო სამი თვე კი ამ ბიზნესის თავის ხელში აღებასა და ამერიკულ ავტო გიგანტთან კავშირების გაწყვეტაში გაატარა. ბლუმბერგთან საუბრისას, ”სპაიკერის” მთავარმა აღმასრულებელმა ვიქტორ მიულერმა განაცხადა, რომ ”სააბი” პარტნიორობის თაობაზე, მოლაპარაკებას რამდენიმე კომპანიასთან აწარმოებს. მაგრამ მას ”ბეემვე” არ უხსენებია. სამაგიეროდ დაადასტურა, რომ შვედური კომპანიის ინტერესი სხვა კომპანიების ტექნოლოგიების და აგრეგატების მისთვის ხელმისაწვდომობაა.

”სააბიც” ადასტურებს, რომ პარტნიორი, ან პარტნიორები ესაჭიროება და ალიანსის შექმნასაც არ გამორიცხავს. კომპანიის განცხადებით, მოდელ 9-3-ზე პატარა ავტომობილის წარმოება, ჯერჯერობით ”სააბის” გეგმებში არ შედის, თუმცა კომპანია თავის საწარმოო პროგრამაში ასეთი მოდელის გამოჩენას ისურვებდა.

თავის მხრივ, ”ბეემვე” თავს არიდებს ”სააბთან” მოლაპარაკებების არსებობაზე საუბარს. თუმცა აცხადებს, რომ ადასტურებს, რომ რამდენიმე კომპანიასთან აწარმოებს მოლაპარაკებას, რომლებიც მისი ტექნოლოგიების გამოყენებით არიან დაინტერესებულნი. უფრო მეტიც, ბავარიელები ირწმუნებიან, რომ შვედურ კომპანიასთან არანაირი კონტაქტი არ აქვთ.

მაგრამ შვედური გაზეთი ”დაგენს ინდუსტრი” ავრცელებს ინფორმაციას, რომლის თანახმადაც, ”სააბი” თავის საშუალო ზომის ქროსოვერ 9-4X-ისთვის, ”ბეემვეს” დიზელის ძრავების გამოყენებასაც გეგმავს. შვედური კომპანია ამ ავტომობილის წარმოებას ”ჯენერალ მოტორსის” მექსიკურ საწარმოში გეგმავს.

”სპაიკერი” იმედოვნებს, რომ 2012 წელს ”სააბის” წარმოების მოცულობა გაორმაგდება და წლიურად 85 000 ავტომობილს მიაღწევს.

”ფოლკსვაგენის” ელექტრო ტაქსი ბერლინისთვის

BMW — Mon, 14 Jun 2010 13:04:01 GMT

”ავტო პანორამას” მკითხველს ემახსოვრება ელექტრომობილი, რომელიც ”ფოლკსვაგენმა” სპეციალურად, მილანის ტაქსის როლში სამუშაოდ შექმნა. ახლა მსგავსი ავტომობილი ვოლფსბურგულმა გიგანტმა ბერლინისთვისაც მოამზადა და მას ”ფოლკსვაგენ ბერლინ ტაქსი” უწოდა.

ისევე როგორც მილანური ტაქსი, ბერლინურიც კომპაქტური გაბარიტებით გამოირჩევა, თუმცა თავის მგზავრებს კომფორტს მაინც სთავაზობს. მისი სიგრძე 3.730 სანტიმეტრი, სიგანე 1.660 სანტიმეტრი და სიმაღლე 1.600 სანტიმეტრია. მასში ჩაჯდომის გასაადვილებლად, იმ მხარეს, საიდანაც მგზავრებს უწევთ ჩაჯდომა, კარი გასაწევია. მძღოლის მხარეს კი ავტომობილს მხოლოდ ერთი, ჩვეულებრივი კარი აქვს.

სალონში ვერ ნახავთ სავარძელს მძღოლის გვერდზე. ეს ადგილი ბარგის დასაწყობადაა გამოყოფილი. ამასთან, ბარგის დაფიქსირება სპეციალური სამაგრითაა შესაძლებელი. მძღოლის სავარძლის გვერდზე დამაგრებულია სენსორული მონიტორი, რომელზეც სხვადასხვა ინფორმაციის (მარშრუტის, მგზავრობის ღირებულების, გზაში ყოფნის დროის და სხვა) გამოტანაა შესაძლებელი. მისი მეშვეობით ასევე შესაძლებელია სხვადასხვა ცნობის მიღება და სალონში სასურველი კლიმატის დაყენება.

”ფოლკსვაგენ ბერლინ ტაქსი” მოძრაობაში 85-კილოვატიან ელექტროძრავს მოჰყავს, რომელსაც ენერგიით ლითიუმ-იონური აკუმულატორების ბლოკი კვებავს. ამ ბლოკის ტევადობა კი საკმარისია იმისათვის, რომ ავტომობილმა შეუჩერებლად 300 კილომეტის გავლა შეძლოს. ამასთან, აკუმულატორების დაახლოებით 80 პროცენტით შესავსებად, ერთი საათიც საკმარისია.
”ფოლკსვაგენი” ელექტრო ტაქსების წარმოების დაწყებას 2013 წელს გეგმავს.

”მინი” კუპესა და როდსტერს გამოუშვებს

BMW — Mon, 14 Jun 2010 13:01:34 GMT

საბოლოოდ გადაწყდა, რომ ინგლისური კომპანია ”მინი”, რომელიც გერმანული ”ბეემვეს” ჯგუფში შედის, ორ ახალ მოდელს - კუპესა და როდსტერს გამოუშვებს. ”მინის” ამერიკული განყოფილების პრეზიდენტმა ჯიმ მაკდაუელმა განაცხადა, რომ ”მინი კუპეს” წარმოება მერმისს, აგვისტოში დაიწყება, მისი ღიაძარიანი ვერსია, ”მინი როდსტერი” კი ბაზარზე ერთი წლით გვიან გამოჩნდება

შეგახსენებთ, რომ ფრანკფურტის შარშანდელ ავტო გამოფენაზე, ”მინიმ” ორი კონცეპტუალური მოდელი - ”კუპე” და ”როდსტერი” გამოფინა და პირველად გვამცნო იმის შესახებ, რომ შესაძლებელი იყო, მის სამოდელო გამას ეს ორი ავტომობილი დამატებოდა.

ახალი სერიული ავტომობილების შესახებ დეტალური ინფორმაცია ჯერ არ გავრცელებულა, თუმცა ძნელი მისახვედრი არ უნდა იყოს, რომ ფარეფნულად ეს ავტომობილები ფრანკფურტში ნაჩვენები კონცეპციებს ძალიან დაემსგავსება, რადგან მათ დამთვალიერებელთა და სპეციალისტთა დიდი მოწონება დაიმსახურეს.

დიდი ალბათობით შეიძლება ითქვას, რომ სპორტული ავტომობილები საბაზო ჰეჩბეკზე მსუბუქები იქნება. ამასთან მათი დიზაინიც ოდნავ განსხვავებული იქნება, თუმცა საერთო ჯამში, ნაცნობსა და ავტომოყვარულთა შორის ერთობ პოპულარულ იერს შეინარჩუნებენ.

ამასთან, ორივეს აღჭურვილობა კონცეპტუალური მოდელების მსგავსი იქნება. ფრანკფურტში ნაჩვენები კუპე აღჭურვილი იყო 1.6-ლიტრიანი ტურბოძრავით, რომელიც 211 ცხენის ძალას იძლევა. სხვათა შორის, ამ ძრავს მის მიერ ”მინის” ჰეჩბეკის მოდერნიზებისას, სატუნინგო ატელიე ”ჯონ კუპერ უორკსი” იყენებს. რაც შეეხება ”როდსტერს”, მის კაპოტქვეშ, ასევე 1.6-ლიტრიანი ძრავი, ოღონდ ტურბოს გარეშე მოთავსდა და ის ”მხოლოდ” 175 ცხენის ძალას იძლევა.

რა თქმა უნდა, ჯერჯერობით ცნობილი არაა, ამ ორიდან რომელი ძრავებით აღიჭურვება უახლესი ”კუპე” და ”როდსტერი”. სამაგიეროდ ცნობილია, რომ ორივე ავტომობილს ”მინის” ოქსფორდის ქარხანა გამოუშვებს.

”ჰიუნდაი ველოსტერი” პარიზული დებიუტისთვის ემზადება

BMW — Mon, 14 Jun 2010 12:59:25 GMT

კორეული კომპანია ”ჰიუნდაი” წარმოებისთვის სრულიად ახალ მოდელს, სპორტულ ”ველოსტერს” ამზადებს. ავტომობილი ამჟამად საგზაო გამოცდებს გადის და ის პაპარაცებმა სწორედ ტესტირების დროს, კამუფლირებულ ფორმაში დააფიქსირეს. მართალია, ის გარეგნულად შენიღბულია, მაგრამ ასეც ადვილად ჩანს, რომ გარეგნულად ის იმ კონცეპტუალურ ავტომობილს დაემგვანება, რომელიც ”ჰიუნდაიმ” ოთხი წლის წინ, სეულის საავტომობილო შოუზე გამოფინა.

კონცეპტუალური მოდელი კი ელეგანტური დიზაინით გამოირჩევა. მას მხოლოდ ორი კარი აქვს, ძარა კი ეგრეთ წოდებული ფასტ ბეკის ტიპისაა. მისი სახურავი ოდნავაა დახრილი და ძრავის მაღალ კაპოტში გადადის. წინიდან და უკნიდან, ავტომობილი დიდრონი ფარებით გამოირჩევა. ამ ავტომობილით, ”ჰიუნდაი” თავის პოპულარულ სპორტულ მოდელ ”კუპეს” (ზოგიერთ ბაზარზე ის ტიბურონის სახელითაა ცნობილი.

”ჰიუნდაი ველოსტერი” ბენზინის 1.6-ლიტრიანი ძრავით აღიჭურვება, რომელიც 121 ცხენის ძალას და 155 ნიუტონმეტრს გამოიმუშავებს. მოგვიანებით, ამავე ავტომობილზე, იგივე ლიტრაჟის ტურბოძრავსაც დააყენებენ, რომლის სიმძლავრეც, მინიმუმ 175 ცხენის ძალა იქნება.

ამ ავტომობილის შესახებ დაწვრილებით ინფორმაციას კორეული კომპანია პარიზულ დებიუტამდე რამდენიმე დღით ადრე გამოაქვეყნებს.

”სუზუკი სვიფტი” ზომებში გაიზარდა

BMW — Mon, 14 Jun 2010 12:56:42 GMT

ოაპონურმა კომპანია ”სუზუკიმ” ინტერნეტით თავის პოპულარულ კომპაქტურ ჰეჩბეკ ”სვიფტის” ფოტოები და ტექნიკური მონაცემები გაავრცელა. ახალი ავტომობილი მის წინამორბედზე გრძელი, ფართე და იმავდროულად, მსუბუქიცაა. ახლის პლატფორა და ბაზა ძველისაზე სესაბამისად, 0.09 და 0.05 მეტრით გრძელია.

ახალი ”სვიფტი” სრულიად ახალ, ბენზინის 1.2-ლიტრიან ძრავს მიიღებს, რომლის სიმძლავრეც 92 ცხენის ძალა, მაქსიმალური მაბრუნი მომენტი კი 120 ნიუტონმეტრია. ძრავთან შესაწყვილებლად განკუთვნილია როგორც მექანიკური, ასევე ავტომატური კოლოფი. კომპანიის მიერ გავრცელებული ინფორმაციის შესაბამისად, ძრავის ხარჯი 100 კილომეტრზე 4.2 ლიტრს შეადგენს, ყოველ კილომეტრზე კი ის ატმოსფეროში 116 გრამ CO2-ს გამოჰყოფს.

ცოტა ხანში კი, ახალი ”სვიფტისთვის” კომპანია 1.3-ლიტრიან დზელის ძრავის მოდიფიცირებას დაასრულებს, რომლის საწვავის ხარჯიც სულ რაღაც 3.5 ლიტრი (100 კმ-ზე), გამონაბოლქვში CO2-ის შემცველობა კი 109 გრამია (ყოველ კილომეტრზე). გარდა ამისა, 2011 წელს კომპანია სპორტულ ”სვიფტსაც” გამოუშვებს, რომელიც 1.6-ლიტრიანი ძრავით აღიჭურვება.

ახალი ”სვიფტის” წარმოებას ”სუზუკი” პარიზული ავტოგამოფენის შემდეგ დაიწყებს და ფასსაც მაშინ დაასახელებს. სავარაუდოდ, ჰეჩბეკის საბაზო, ყველაზე იაფი ვერსია 13 000 ევრო ეღირება.

”მინი” შვიდადგილიან ”ქანთრიმენზე” მუშაობს

BMW — Mon, 14 Jun 2010 12:56:06 GMT

პოპულარულ რეტრო ჰეჩბეკების მწარმოებელმა ბრიტანულმა კომპანია ”მინიმ” ქროსოვერ ”ქანთრიმენის” დაგრძელებული ვერსიის წარმოება გადაწყვიტა, ავტომობილისა, რომელსაც შვიდი ადგილი (მათ შორის, მძღოლისაც) ექნება. ეს ქროსოვერი ”მინის” სამოდელო გამაში ისედაც ყველაზე ტევადი ავტომობილია და ამიერიდან, ის კიდევ უფრო გაიზრდება, სახელში კი ”პლუს” დაემატება.

”მინის” მთავარ ბრენდ მენეჯერის, დოქტორ ვოლფგანგ არმბრეხტის განცხადებით, ”ქანთრიმენის” ბორბლებს შორის ბაზა 2.591 მეტრია, ”ქანთრიმენ პლუსისთვის” კი ის 2.713 მეტრამდე გაიზრდება. შესაბამისად, გაიზრდება ავტომობილის სიგრძეც.

ამგვარად, ”მინი” თანდათან ცდილობს თავისი ავტომობილების გაბარიტების გაზრდას. სხვათა შორის, ინტერნეტით ვრცელდება ინფორმაცია იმის შესახებ, რომ შემდეგ საბაზო ჰეჩბეკიც ზომებში მოიმატებს.

რაც შეეხება შვიდადგილიან ”ქანთრიმენ პლუსს”, სავარაუდოდ ბაზარზე ის კონკურენციას ისეთ პოპულარულ ავტომობილებს გაუწევს, როგოებიცაა ”ტოიორას” RAV4 და ”ჰონდას” CR-V.

”ასტონ მარტინს” სხვებმაც რომ მიბაძონ...

BMW — Wed, 09 Jun 2010 11:36:16 GMT

შარშან ”ასტონ მარტინმა” ყველა გაოცებული დატოვა, როდესაც საზოგადოებას თავისი ახალი გეგმის შესახებ ამცნო. გეგმა ”ტოიოტას” ჯუჯა ჰეჩბეკ iQ-ს ბაზაზე, პატარა ასტონის, სახელად ”სიგნიტ”, შექმნას ითვალისწინებდა. ეს განცხადება პირველ აპრილს არ გამოქვეყნებულა, მაგრამ ალბათ ბევრმა არ დაიჯერა, რომ ამგვარი რამ შესაძლებელი იყო.

მაგრამ ფრანკფურტის საავტომობილო შოუზე, საავტომობილო სამყარო რეალური ”სიგნიტის” კონცეპტუალური ვერსიის პრემიერის მომსწრე გახდა და რა თქმა უნდა, ამჯერად გამოქვეყნებულ რელიზებსაც და საკუთარ თვალებსაც ყველამ დაუჯერა.

რისთვის სჭირდება ”ასტონ მარტინს” ასეთი სათამაშოს, თუნდაც ძალიან მიმზიდველისა და სასურველის, გამოშვება? ვითომ იმისათვის, რომ თავისი პროდუქცია იმ ადამიანებისთვისაც ხელმისაწვდომი გახადოს, ვისაც ჩვეულებრივი (უფრო სწორედ, არაჩვეულებრივი) ასტონების შეძენა არ შეუძლია? მაგრამ ამ კითხვაზე პასუხი თავად ინგლისურმა კომპანიამ ფრანკფურტშივე გასცა, როდესაც გამოაცხადა, რომ ”სიგნიტს” პირველ რიგში, სხვა, ძვირადღირებული ”ასტონ მარტინების” მყიდველები შეიძენენ, რომლებისთვისაც, სუპერავტომობილებით ქალაქის ქუჩებში მოძრაობა პრობლემურია.

”სიგნიტის” წარმოების დაწყების აუცილებლობის მეორე ვარაუდი გაცილებით პრაგმატულია და ამის მთავარი მიზეზი ისაა, რომ მალე ავტომწარმოებლებს ევროპის ბაზარზე გამონაბოლქვთან დაკავშირებით, უმკაცრეს სტანდარტებს დაუწესებენ. და ვინც ამ სტანდარტებში ვერ ჩაეტევა, მის მიერ წარმოებულ ავტომობილებზე საჯარიმო გადასახადების გადახდა მოუწევს. ეს კი მათს პროდუქციას გააძვირებს.

”სიგნიტს” კი ”ასტონ მარტინის” მიერ წარმოებული ავტომობილების გამონაბოლქვში ნახშირორჟანგის შემცველობის საშუალო მაჩვენებლის მნიშვნელოვნად შემცირება შეუძლია. ასე კი, სუპერ ავტომობილების ფასების მწვერვალებისკენ გაქცევა აღიკვეთება.

ჰოდა, თუ ასეა, რატომ არ უნდა მიბაძონ ”ასტონ მარტინს” იმ კომპანიებმაც, რომლებიც სუპერ ავტომობილების სეგმენტში მუშაობენ? ამისათვის ხომ ”ფერარის” შესანიშნავი ბაზა გააჩნია ”ფიატის” სახით. ხომ შეიძლება, პოპულარულ ”ჩინკვეჩენტოს” ტიუნინგი მარანელოში ჩაუტარდეს და ”აბარტის” მორიელის ნაცვლად, ყალყზე შემდგარი კვიცით დამშვენდეს?

არავინ იცის, ეს მოხდება, თუ არა. სამაგიეროდ, ჰოლანდიურ საავტომობილო ბლოგ ”ავტობლოგის” ერთ-ერთმა მკითხველმა იასპერ ფან დერ ჰაიდენმა საინტერესო სამუშაო შეასრულა და ამავე ბლოგს მის მიერ შესრულებული ორი ესკიზი გაუგზავნა. ამ ესკიზებზე კი ”ბუგატის” და ”ბენტლის” მინი ჰეჩბეკებია გამოსახული.

თუ ნახატებზე გამოსახული ავტომობილების პროპორციების მიხედვით ვიმსჯელებთ, ორივე ”ფოლკსვაგენ პოლოს” (იგივე სეატ იბისას, ან შკოდა ფაბიას) ბაზაზე შექმნას ითვალისწინებს. მოკლედ, ჰოლანდიელი დიზაინერის ვერსიით, მინი ”ბუგატიც” და ”ბენტლიც” ”ასტონის” ”სიგნიტზე” დიდები იქნება.

ნეტავ, ფან დერ ჰაიდენის ეს საინტერესო ესკიზები ვოლფსბურგული საავტომობილო დიდი ოჯახის (რომლის წევრებიც არიან ბუგატი და ბენტლი) მესვეურებს თუ დააინტერესებს?

შენიშვნა: წყარო საიტი http://carscoop.blogspot.com

http://carscoop.blogspot.com/2010/06/fantasia-bugatti-eb12-tsi-and-bentley.html

”პოლო სედანი” – ”ფოლკსვაგენის” მომავალი ბესტსელერი

BMW — Wed, 09 Jun 2010 11:34:11 GMT

უკვე რამდენიმე წელია, რაც ”რენომ” იაფფასიან მოდელ ”ლოგანის” წარმოება დაიწყო და ეს ექსპერიმენტი იმდენად წარმატებული გამოდგა, რომ მის მიბაძვას უკვე თითქმის ყველა დიდი და ამბიციური ავტომწარმოებელი ცდილობს. რა თქმა უნდა, ასეთებს შორისაა ”ფოლკსვაგენიც”, რომელმაც ახლახანს, მოსკოვში თავისი ახალი ავტომობილის, იაფფასიან ”პოლო სედანის” პრეზენტაცია მოაწყო.

მისი დაარსების დღიდან, ვოლფსბურგული გიგანტი ”სახალხო ავტომობილის” მწარმოებლადაა მიჩნეული. ჯერ ერთი, მას ასეც ჰქვია - ფოლკს სახალხოს ნიშნავს, ვაგენი კი ავტომობილია. მეორეც, ”ფოლკსვაგენები” ყოველთვის ხელმისაწვდომი ფასით გამოირჩეოდნენ. მაგრამ დრომ თავისი მოიტანა - ვოლფსბურგელთა ყველაზე პოპულარული ავტომობილები თანდათან ზომებშიც გაიზარდნენ და თვისობრივადაც პრემიუმ კლასს მიუახლოვდნენ. მართალია, ”ფოლკსვაგენი” ჯერაც არაა ავტო ინდუსტრიის ელიტის წევრი. მაგრამ მისი პროდუქცია ამ კასტას აშკარად შეესაბამება, ამის პირდაპირი შედეგი კი ფასების განუხრელი ზრდა და ამ მხრივაც, შედეგი პრემიუმ კლასთან მიახლოებაა. შესაბამისად, ფასები კიდევ უფრო ზევით მიიწევს...

ამ ტრენდის შეცვლის, ან ყოველ შემთხვევაში, ”სახალხოს” იმიჯის შენარჩუნების, ან თუ გნებავთ, ”რენოს” მიერ დაწყებული ახალი ტრენდისთვის ფეხის აყოლების ვოლფსბურგულ ვერსიას კი ”ფოლკსვაგენ პოლო სედანი” ეწოდა.

თავიდანვე უნდა ითქვას, რომ ეს გლობალური მოდელია. ანუ, ვოლფსურგელები მის მთელს მსოფლიოში, პირველ რიგში კი სწრაფად განვითარებადი ქვეყნების ბაზრებზე გაყიდვას აპირებენ. რა თქმა უნდა, მათთვის ყველაზე მნიშვნელოვანი ამ მხრივ, ჩინური ბაზარია, მაგრამ რატომღაც ისე მოხდა, რომ მისი წარმოება პირველად ”ფოლკსვაგენმა” რუსეთში დაიწყო. ალბათ ამის გამო იყო, რომ იქაურმა ჟურნალისტებმა ავტომობილს ”რუსული ფოლკსვაგენი” უწოდეს.

აქვე ისიც უნდა ითქვას, რომ თუ ევროპაში ”ფოლკსვაგენის” ავტომობილები თანდათან ძვირდება, ლათინური ამერიკის ქვეყნებში ის კვლავაც ჰყიდის იაფფასიან მოდელებს - ”ფოქსს”, ”გოლსა” და ”ვოიაჯერს”. მაგრამ რატომღაც, ეს ავტომობილები სხვა ბაზრებზე არ გააქვს და თუ გააქვს კიდეც, ისინი სხვაგან ფეხს ვერ იკიდებენ. ჰოდა, ”პოლო სედანს” სწორედ ის მისია აკისრია, რომ მსოფლიოს ყველა მნიშვნელოვან ბაზარს ერთნაირი წარმატებით მოერგოს.

გერმანული კომპანიის განცხადებით, ”პოლო სედანი” სამოდელო გამაში, ორი პოპულარული სედანის - ”პასატისა” და ”ჯეტას” დაბლა არსებულ ნიშას დაიკავებს. ამგვარად, როგორც სახელიდანაც შეიძლება ვივარაუდოთ, ის ჰეჩბეკ ”პოლოს” შესაბამისი სედანია, თუმცა ამ ავტომობილზე დიდი გაბარიტებით გამოირჩევა. მისი სიგრძე 4.384 მეტრია, უფრო მეტი, ვიდრე მეოთხე თაობის ”გოლფის” ბაზაზე შექმნილ ”ბორას” (იგივე ჯეტას) ჰქონდა. სიგანე 1.699 მეტრამდე გაიზარდა (ჰეჩბეკ პოლოსი - 1.682 მეტრია), ბაზა - 2.552 მეტრამდე (ჰეჩბეკისა - 2.470 მეტრია). ”პოლო სედანის” სიმაღლე 1.463 მეტრია, საბარგულის მოცულობა კი - 460 ლიტრი.

რა თქმა უნდა, ახალი ავტომობილის გარეგნობაზე მუშაობას, სახელოვანი დიზაინერი ვალტერ დე სილვა უძღვებოდა. მისი დამსახურებაა ის, რომ ”პოლო სედანს” სადა და, შეიძლება ითქვას, დაუწუნარი გარეგნობა აქვს. ის აშკარად არ გამოირჩევა ექსტრავაგანტურობით, თუმცა ეს არც მოეთხოვება. სამაგიეროდ, თავისუფლად აკმაყოფილებს კორპორატიული სტილის მოთხოვნებს - ემბლემის გარეშეც, მასში ადვილად ამოიცნობთ ვოლფსბურგული ოთხბორბლიანების ოჯახისადმი კუთვნილებას.

”პოლო სედანის” ინტერიერიც მისი გარეგნობის მსგავსად, უბრალო და კოხტაა. რაც მთავარია, ის ”ფოლკსვაგენის” სტილშია შესრულებული. აქ ვერც კონდიციონერს ნახავთ, ვერც მაგნიტოლას და კომფორტისთვის საჭირო სხვა რამეებს - ესენი ხომ ავტომობილს ძალიან გააძვირებენ. სამაგიეროდ, მსურველს მათი დამატებითი ოპციის სახით შეკვეთით შეძენა შეუძლია. მთავარია, რომ ასე ვოლფსბურგელები საბაზო ფასის 10 000 ევროს სიახლოვეს შენარჩუნებას ახერხებენ. და თუ ვინმეს მეტი მოუნდება, თავის სურვილს ჩვეულებრივი შეკვეთით დაიკმაყოფილებს და მეტსაც გადაიხდის.

ჯერჯერობით, ”პოლო სედანისთვის” მხოლოდ ერთი, ბენზინის 1.6-ლიტრიანი ძრავია გათვალისწინებული, რომელიც სულ რაღაც, 105 ცხენის ძალას გამოიმუშავებს. მყიდველის სურვილის შესაბამისად, მას ან 5-საფეხურიანი მექანიკური, ან 6-საფეხურიანი ავტომატური კოლოფი შეუწყვილდება. რა თქმა უნდა, ძრავი საკმაოდ სუსტია და აქედან გამომდინარე, ავტომობილი ტემპერამენტულობით ვერ დაიკვეხნის - ადგილიდან 100 კმ/სთ სიჩქარის ასაკრეფად, მას 10.5 წამი სჭირდება. სამაგიეროდ, ის ეკონომიურია - შერეული ციკლით მოძრაობისას, 100 კილომეტრის გასავლელად, 6.5 ლიტრი ბენზინი ჰყოფნის. თუ გავითვალისწინებთ, რომ ”პოლო სედანის” საწვავის ავზის მოცულობა 55 ლიტრია, გამოდის რომ, მისი ერთი სრული გაწყობით, 700 კილომეტრზე მეტის გავლაა შესაძლებელი.

10 000 ევროს საფასურად, ”პოლო სედანის” საბაზო ვერსიას (ტრენდლაინ) შეიძენთ, რომლის კომპლექტაციაშიც შედის: ორი ცალი უსაფრთხოების ბალიში, შუშის ელექტროამწევები და საბორტო კომპიუტერი. სამაგიეროდ, კონდიციონერის გარდა, აქ ვერც ბლოკირების საწინააღმდეგო სისტემას ნახავთ. თუმცა, ჩამოთვლილთაგან ზოგიერთი მოწყობილობა ”პოლო სედანის” კომპლექტაცია ”კომფორტლაინის” პაკეტში შევა. კიდევ უფრო მდიდრული აღჭურვილობით და რა თქმა უნდა, გაზრდილი ფასით, კომპლექტაცია ”ჰაილაინი” გამოირჩევა. სხვათა შორის, მისი ფასი იმდენად მაღალია, რომ ”გოლფის” კლასის ავტომობილებისას უახლოვდება.
სამწუხაროდ, საქართველოს ბაზარზე ”პოლო სედანის” შემოყვანას, ”ფოლკსვაგენის” დისტრიბუტორი, კომპანია ”კრეს ავტოჰაუსი” ჯერჯერობით არ გეგმავს.

”აუდის” დიზელისძრავიანი ბოლიდი ლე მანის რბოლისთვის მზადაა

BMW — Wed, 09 Jun 2010 11:31:34 GMT

”აუდის” ლე მანის 24-საათიანი რბოლისადმი განსაკუთრებული დამოკიდებულება აქვს. უკვე დიდი ხანია, გერმანული კომპანიის სარბოლი პროტოტიპები ლეგენდარულ რბოლაში პირველობას არავის უთმობენ. უფრო მეტიც, 2006 წლიდან მოყოლებული, ”ოთხრგოლიანები” რბოლებს დიზელისძრავიანი მანქანებით იგებენ და ამ სეზონშიც იგივეს აპირებენ.

წლევანდელი რბოლისთვის ”აუდიმ” თავის სარბოლ პროტოტიპ R15 TDI-ის ახალი ვერსია მოამზადა, რომელიც წინამორბედისგან არამარტო გარეგნობით, სხვა უამრავი კონსტრუქციული ნაწილითაც განსხვავდება. მოდერნიზაციის მთავარი მიზანი, ავტომობილის გამძლეობის და ეფექტურობის გაუმჯობესება იყო.

ახალ ავტომობილს ”აუდი R15 TDI პლუს” ეწოდა. ის კვლავ 5.5-ლიტრიანი V12 დიზელითაა აღჭურვილი, რომელიც 620-ზე მეტ ცხენის ძალას იძლევა. არადა, ტექნიკური რეგლამენტი, რბოლის მონაწილეებს, ძრავებთან დაკავშირებით, ბევრ შეზღუდვას უწესებს.

პირველ რიგში, შეიცვალა ავტომობილის აეროდინამიკა, რომელიც მაღალი სიჩქარით მოძრაობისას, მის უფრო ეფექტურ მდგრადობას უზრუნველყოფს. შეიცვალა რადიატორის განლაგება, კოკპიტი კი უფრო ერგონომიული გახდა. შეიცვალა ავტომობილის განათების სისტემა, რომელშიც ახლა მტავარ როლს LED-ელემენტები ასრულებს. ამის წყალობით, ღამით რბოლისას, განათება გაცილებით ეფექტურია.

”აუდი R15 TDI პლუსს” ინტენსიური ტესტები ჩაუტარდა, რომელთა განმავლობაშიც, მანქანამ 40 000 კილომეტრი გაიარა და ფაქტობრივად, ჩვენს პლანეტას ეკვატორულ სარტყელში, გარს შემოუარა (ვირტუალურად). გამოცდების დროს, მანქანამ გამძლეობაზე ორი სრულფასოვანი ტესტი ჩააბარა, რომელთა დროსაც, 30-30 საათი სარბოლ რეჟიმში იმუშავა. გარდა ამისა, მას აეროსნმიკური ტესტები ჩაუტარდა როგორც ტრასაზე, რბოლისას, ასევე სპეციალურ აეროდინამიკურ მილში. შემოწმება გაიარა ავტომობილის ძრავის გაგრილების სისტემამაც. ამისთვის, სპეციალურად დაბინძურებული გზის საფარი იქნა შერჩეული, რათა დადგენილიყო, რამდენად გამართულად მუშაობს რადიატორი და მისი ბადე, როდესაც ხანგრძლივი რბოლისას, მათი ზედაპირი მტვრით და ჭუჭყით იფარება. გარდა ამისა, ავტომობილმა ორ რბოლაშიც (საფრანგეთის ლე კასტელეში და ბელგიის სპა ფრანკორშანზე) მიიღო მონაწილეობა, რაც ასევე მისი ტესტირებისთვის იქნა გამოყენებული.

გერმანულ კომპანიაში იმედოვნებენ, რომ ესოდენ ძვირადღირებული სატესტო პროგრამა, მათ ლე მანზე კიდევ ერთი დიდი გამარჯვების მოპოვებაში დაეხმარება.

გორდონ მარიმ ელექტრომობილ T.27-ს მონაცემები გამოაქვეყნა

BMW — Wed, 09 Jun 2010 11:30:50 GMT

ცნობილმა ბრიტანელმა ინჟინერმა გორდონ მარიმ, ვისაც ერთ დროს ფორმულა 1-ში არაერთი საინტერესო პროექტი აქვს შექმნილი, შემდეგ კი, ”მაკლარენის” ლეგენდარულ სუპერ ავტომობილ F1-ის შექმნას ხელმძღვანელობდა, თავისი ახალი პროექტის, ჯუჯა ელექტრომობილ T.27-ის შესახებ ინფორმაცია გამოაქვეყნა და პირობა დადო, რომ ეს მანქანა მსოფლიოში ყველაზე ეფექტური ელექტრომობილის წოდებას მოიპოვებს.

ელექტრომობილ T.27-ის შემუშავებაში, მარის ინგლისური კომპანია ”ციტეკ ავტომოტივი” ეხმარება, რომელიც ავტომობილისთვის ელექტრულ ძალურ სისტემას - ძრავს და მის მკვებავ სისტემას ამუშავებს. პროექტი 9 მილიონ გირვანქა სტერლინგადაა შეფასებული. ამ თანხის ნახევარი მისთვის ბრიტანეთის მთავრობის ტექნოლოგიური სტრატეგიის საბჭომ გაიღო. მარიმ პროექტზე მუშაობა 16 თვის წინ დაიწყო და აცხადებს, რომ პირველი სრულფასოვანი პროტოტიპი მზად 2011 წლის აპრილში იქნება.

ჯუჯა ავტომობილს, რომელიც გაბარიტებით ”სმარტზე” პატარა იქნება, მამოძრავებელ ძალას 34-ცხენისძალიანი ელექტროძრავი მიანიჭებს, რომელსაც ენერგიით 12 კილოვატსაათი ტევადობის მქონე ლითიუმ-იონური აკუმულატორების ბლოკი მოამარაგებს.

T.27-ის სიგრძე 2.5 მეტრი, სიგანე 1.3 მეტრი, სიმაღლე 1.6 მეტრი, ბორბლებს შორის ბაზა კი 1.78 მეტრია. ავტომობილის წონა 680 კილოგრამი უნდა იყოს. ჯუჯა ელექტრომობილის სიჩქარე 100 კმ/სთ-ს 15 წამში მიაღწევს, მისი მაქსიმალური სიჩქარე კი სულ რაღაც 105 კმ/სთ იქნება. ავტომობილი აკუმულატორების ერთი სრული დამუხტვით 160 კილომეტრის გავლას შეძლებს.

მართალია, T.27 ატმოსფეროს ნახშირორჟანგით უშუალოდ არ დააბინძურებს, მაგრამ ის ელექტროენერგია, რომელიც მას ქალაქში სამოძრაოდ დასჭირდება, კილომეტრზე 48 გრამი CO2-ის, შერეული ციკლით მოძრაობისას კი 28 გრამის ექვივალნტური იქნება. მარის განცხადებით, თავისი ექსპლუატაციის განმავლობაში, T.27 დაახლოებით 42 პროცენტით ნაკლებად დააბინძურებს გარემოს, ვიდრე ბრიტანეთში მოძრავი ავტომობილების შესაბამისი საშუალო მაჩვენებელია.

ცნობისათვის, მარი და მისმა დიზაინერულმა კომპანიამ უფრო ადრე, მუშაობა პროექტ T.25-ზე დაიწყეს, რომელიც საქალაქო ჯუჯა ავტომობილის წარმოებას ითვალისწინებს. ამ ავტომობილის ბაზაზე მუშავდება ელექტრომობილი T.27. ორივესთვის კი მარის კიდევ ერთი, წარმოების ახლებური ტექნოლოგია ”აისტრიმი” აქვს შემუშავებული, რომლის წყალობითაც, ავტომობილის წარმოების დასაწყებად საჭირო ინვესტიციის და წარმოების დროს აუცილებელი ენერგიის მოცულობის მნიშვნელოვნად შემცირებაა შესაძლებელი.

და, რაც მთავარია: ამ ავტომობილების წარმოებას თავად მარის კომპანია არ გეგმავს. ის მხოლოდ შესაბამისი ტექნოლოგიების გაყიდვითაა დაინტერესებული. მარი ამბობს, რომ ამ ეტაპზე, მოლაპარაკებას ორი კომპანია აწარმოებს, რომლებიც ჯუჯა ავტომობილების ბრიტანეთში წარმოებას გეგმავენ. თუ ორივე საწადელს მიაღწევს, ისინი დამატებით 6 000 სამუშაო ადგილს შექმნიან.

რაიკონენმა მოტოციკლისტს აჯობა

BMW — Wed, 09 Jun 2010 11:29:58 GMT

ავსტრიის ერცბერგში ტრადიციული მოტო როდეო ჩატარდა, რომელშიც 1500-ზე მეტმა ავტო და მოტომრბოლმა მიიღო მონაწილეობა. მათ შორის ყველაზე საინტერესო კი ფორმულა 1-ში მსოფლიოს 2007 წლის ჩემპიონის, ფინელი კიმი რაიკონენისა და მოტო ტრაიალში მსოფლიოს სამგზის ჩემპიონის, პოლონელი ტედი ბლაზუსიაკის დუელი იყო.

ასპარეზობას 30 000-ზე მეტი მაყურებელი დაესწრო. რაიკონენმა როდეოზე მონაწილეობა თავისი ”სიტროენ C4 WRC-ით” იასპარეზა, რომლიტაც ამ სეზონში, რალის მსოფლიო ჩემპიონატზე გამოდის. ბლაზუსიაკმა კი თავისი ორბორბლიანი ”საბრძოლო ცხენით”, ავსტრიულ კომპანია KTM-ის საქროსო მოტოციკლით იასპარეზა. როდეოს ტრადიციისამებრ, დუელში წაგებულს, გამარჯვებულისთვის მანქანა უნდა გაერეცხა...

კიმი რაიკონენი და ტედი ბლაზუსიაკი (მარჯვნივ)
..........................................

როგორც მოსალოდნელი იყო, შეჯიბრმა დიდი ინტერესი გამოიწვია, მისი კულმინაცია კი ავტომრბოლისა და მოტომრბოლის გახდა. რბოლის 13-კილომეტრიანი დისტანცია, რომლის განმავლობაშიც, მის მონაწილეებს არაერთი უძნელესი მოსახვევის გავლა მოუხდათ, რაიკონენმა მეტოქეზე 25 წამით სწრაფად გაიარა.

”ამგვარ შეჯიბრში მონაწილეობა პირველად მივიღე და მისგან დიდი სიამოვნება მივიღე. დაძაბული ბრძოლა გვქონდა, თუმცა დისტანციის მიწურულს, მე უფრო სწრაფი ვიყავი. მე ის ფაქტორი დამეხმარა, რომ რალის სარბოლ ავტომობილს ქროსის მოტოციკლზე გაცილებით მეტი სიჩქარე აქვს, რთულ მოსახვევებს კი ჩვენ დაახლოებით ერთნაირად გავდიოდით. საერთოდ, მოტოციკლები ძალიან მომწონს და მიხარია, რომ ტედისთან ურთიერთობის საშუალება მომეცა”, - ფინიშის შემდეგ განაცხადა რაიკონენმა.

შეგახსენებთ, რომ ფინელმა პილოტმა გასული სეზონის შემდეგ, ”ფერარი” დატოვა და სხვა გუნდებთან წარმოებული უშედეგო მოლაპარაკებების შემდეგ, რალის მსოფლიო ჩემპიონატზე გადაინაცვლა, სადაც ჯერჯერობით, მხოლოდ რამდენიმე ქულის მოპოვება შეძლო.

კარგა ხანს, ფორმულა 1-ის პადოკში ლაპარაკობდნენ იმაზე, რომ მომავალ სეზონში, რაიკონენი ”რედ ბულში” ავსტრალიელ მარკ უებერს შეცვლიდა, თუმცა ბოლო ინფორმაციით, ენერგეტიკული სასმელების მწარმოებელი ავსტრიული კომპანიის (რედ ბულის) გუნდს უებერთან კონტრაქტის გაგრძელება სურს...

”ფიატი” ხუთ საბაზო პლატფორმას დაიტოვებს

BMW — Tue, 01 Jun 2010 08:22:10 GMT

ახალი ფიატ უნო

................................................

”ფიატი” თავის საწარმოო პროგრამაში პლატფორმების მკვეთრად შემცირებას გეგმავს. ამ გეგმის მიხედვით, მომავალში იტალიურ კონცერტს მხოლოდ ხუთი უნივერსალური პლატფორმა ექნება, რომლებზეც საკუთარი ავტომობილების გარდა, თავის ჯგუფში შემავალი ყველა ბრენდის (მათ შორის, ამერიკული კრაისლერისაც) ავტომობილებსაც დააფუძნებს.

ტურინელების განმარტებით, მაღალტექნოლოგიური, მოქნილი არქიტექტურების გამოყენებით, შესაძლებელი იქნება წარმოების დანახარჯების მნიშვნელოვნად შემცირება და ახალი მოდელების შემუშავების დროის შემცირება. ეს ნიშნავს, რომ მოდელების შეცვლა-განახლება გაცილებით სწრაფად განხორციელდება, რაც მათზე მოთხოვნას და მათს კონკურენტუნარიანობას გაზრდის.

ახალი კმპაქტური პლატფორმა

..........................................

ეს გეგმა განსაკუთრებით მომგებიანი ”კრაისლერისთვის” გახდება, რომელსაც სასწრაფოდ ესაჭიროება არსებული მოდელების განახლება და თავისი გამის ახალი ავტომობილებით შევსება. ამას კი ამერიკელები გაცილებით ნაკლები დანახარჯით გააკეთებენ, რაც მათს მდგომარეობას მოკლე ხანში გააუმჯობესებს.

”ფიატმა” გამოაქვეყნა მონაცემები, რომელთა მიხედვითაც, 2006 წელს კომპანიამ 32 მოდელი 19 პლატფორმაზე (არქიტექტურაზე) აწარმოა. წელს მოდელების რაოდენობა 38-მდე გაიზრდება და მათთვის მხოლოდ 11 პლატფორმას გამოიყენებენ, სამი წლის შემდეგ კი მოდელების რაოდენობა იგივე დარჩება, პლატფორმების რიცხვი კი ხუთამდე შემცირდება. ”ფიატი” იმედოვნებს, რომ ამ რეფორმის შედეგად, მის ჯგუფში შემავალი ყველა ბრენდის წარმოების ჯამური მოცულობა ოტხჯერ გაიზრდება.

ხუთი ახალი პლატფორმიდან, ყველაზე მნიშვნელოვანი და მასობრივი სამი გახდება. ესენია მინი, მცირე და კომპაქტური პლატფორმები. მათზე იტალიურ საავტომობილო ჯგუფის მიერ წარმოებული ავტომობილების დაახლოებით 70 პროცენტი მოვა. მათზე ააგებენ არამარტო იტალიური ბრენდების (ფიატი, ალფა რომეო და ლანჩა), არამედ ”კრაისლერის” ავტომობილებსაც.

მინი გლობალური მოდულური არქიტექტურა

ეს ”ფიატის” საწარმოო პროგრამაში ყველაზე მცირე ზომის პლატფორმაა და მას ტურინელებისთვის ყველაზე დიდი მოგება მოაქვს. მასზეა დაფუძნებული ტურინელთა ორი ბესტსელერი - მოდელი 500 და ”პანდა”. წარმოების ჯამური მოცულობა 500 ათასს აღწევს. ამასთან, ამავე პლატფორმას ”ფორდი” თავის მოდელ ”კა-სთვის” იყენებს, რასაც ”ფიატისთვის” დამატებითი მოგება მოაქვს.

მალე ამავე პლატფორმაზე და ”ფიატ 500-ის” ბაზაზე, ავტომობილების წარმოებას ”კრაისლერიც” დაიწყებს. ჯგუფის ხელმძღვანელობა იმედოვნებს, რომ ამ პლატფორმაზე წარმოებული ავტომობილების რაოდენობა 2012 წელს 900 000-ს მიაღწევს, კიდევ ორი წლის შემდეგ კი 1.2 მილიონამდე გაიზრდება. აქედან ”კრაისლერზე” 200 ათასი ავტომობილი მოვა.

მცირე გლობალური მოდულური პლატფორმა

ამ პლატფორმაზე ”ფიატი” კიდევ ერთი ბესტსელერისთვის - ”პანდასთვის” იყენებს. ახლო მომავალში, ამ პლატფორმას მნიშვნელოვანი მოდერნიზაცია ჩაუტარდება, რათა მან აშშ-ში ქრეშ-ტესტების გავლა შეძლოს და იქაური მკაცრი მოთხოვნები დააკმაყოფილოს. ამასთან, ეს პლატფორმა მოქნილიც იქნება და მასზე იმ ავტომობილებსაც ააგებენ, რომლებიც სამხრეთ ამერიკაში გაიყიდება. ასეთი ავტომობილია, მაგალითად ახალი ”უნო”, რომლის პრეზენტაციაც ბრაზილიაში ახლახანს ჩატარდა.

წელს ამ პლატფორმაზე სულ 500 000 ავტომობილს გამოუშვებენ, ორ წელიწადში, მათი რაოდენობა 800 000-მდე გაიზრდება, კიდევ ორი წლის შემდეგ კი 1.1 მილიონს მიაღწევს. აქედან დაახლოებით 150 000 ცალს ”კრაისლერის”, ან მის ჯგუფში შემავალი ”დოჯის” მარკით გამოუშვებენ.

კომპაქტური გლობალური მოდულური არქიტექტურა

ეს პლატფორმა უკვე შემუშავებულია და პირველი ავტომობილი, რომელზეც ის გამოიყენეს, უახლესი ”ალფა ჯულიეტაა”. ”ფიატის” შეფასებით, კომპაქტური პლატფორმა მისთვის ყველაზე მნიშვნელოვანია. ის იმ პლატფორმას შეცვლის, რომელზეც ამჟამად ”ფიატ ბრავოს”, ”ლანჩა დელტას” და ”ალფა 156-ის” ბაზაზე შექმნილ ”ალფა 147-ს” და ”ალფა GT0-ს” უშვებენ. ამავე პლატფორმას ”ალფა რომეოს” მოდელების - 159-ის, ”ბრერას” და ”სპაიდერის” წარმოებაშიც გამოიყენებენ.

ახალი კომპაქტური პლატფორმა ”ბრავოს” პლატფორმაზე გაცილებით უკეთესი, 147-საზე გაცილებით უსაფრთხო, ”კრაისლერის” ახლანდელ პლატფორმებზე გაცილებით მსუბუქი იქნება. ამასთან, იმის გამო, რომ ბევრ მოდელზე გამოიყენებენ, ის უფრო იაფიც ეღირება, რაც საბოლოო პროდუქტებსაც გააიაფებს და კონკურენტუნარიანს გახდის. ამ პლატფორმაზე ”ფიატი” 2014 წელს 1.4 მილიონი ავტომობილის წარმოებას აპირებს.

ახვათა შორის, ეს პლატფორმა ორი ძირითადი ზომისა იქნება. მას წამყვანი წინა ბორბლები ექნება, თუმცა ადვილად ”აითვისებს” სრულამძრავიან ტრანსმისიასაც.

”იაგუარი” სამოდელო გამას გააფართოებს

BMW — Tue, 01 Jun 2010 08:19:53 GMT

კარლ-პეტერ ფორსტერი
...............................................................

ინდური საავტომობილო კომპანია ”ტატა მოტორსი” თავისი ორი ბრიტანული ბრენდის - ”იაგუარის” და ”ლენდ როვერის” ჩინეთის და სხვა სწრაფად განვითარებადი ქვეყნების ბაზრებზე ექსპანსიას და ჩინეთში ამ ორი მარკის ავტომობილების წარმოებას გეგმავს. თავიდან, ორივე ბრენდით, წლიურად სულ 40 000 ავტომობილის წარმოება იგეგმება, თუმცა მოთხოვნის ზრდის პარალელურად, წარმოების მოცულობაც გაიზრდება. მათი მთავარი კონკურენტი კი გერმანული კომპანიები - ”მერსედეს-ბენცი” და ”ბეემვე” იქნება.

”ტატა მოტორსის” მთავარი აღმასრულებელი კარლ-პეტერ ფორსტერი ამბობს, რომ ”ლენდ როვერი” და ”იაგუარი” მარტო ჩინეთში კი არა, მთელი მსოფლიო მასშტაბით აპირებს ზრდას.

”ჩინეთი სწრაფად მზარდი ბაზარია, ჩვენ კი გვინდა, რომ ჩვენი გაყიდვები მთელს მსოფლიოში გაიზარდოს. ჩვენ ჩინეთში, ევროპაში, ჩრდილოეთ და სამხრეთ ამერიკასა და აფრიკაში ვაპირებთ ჩვენი ბიზნესის გააქტიურებას, რადგან მიგვაჩნია, რომ ამისთვის საჭირო რესურსი გაგვაჩნია”, - სააგენტო ბლუმბერგთან საუბრისას განაცხადა ფორსტერმა.

იაგუარ XK180
..........................................

მანვე ორივე ბრენდის სამომავლო გეგმებიც ზოგადად მიმოიხილა. კერძოდ, ფორსტერმა, ვინც ცოტა ხნის წინ, ”ჯენერალ მოტორსის” ევროპული შტოს პრეზიდენტი და ”ოპელის” სამეთვალყურეო საბჭოს თავმჯდომარე იყო, განაცხადა, რომ მალე ”ლენდ როვერის” გამას ახალი კომპაქტური მოდელი - LRX დაემატება, რომელსაც, კომპანიის ისტორიაში პირველს, წამყვანი წინა ბორბლები ექნება.

გაცილებით მეტი სიახლე ”იაგუარის” გამაში იგეგმება. ფორსტერის თქმით, უკვე მწვანე შუქი აუნთეს თითქმის მივიწყებულ პროექტს, რომელიც როდსტერ F-ტაიპის გამოშვებას ითვალისწინებს. ”იაგუარი” იმედოვნებს, რომ ამ ავტომობილით კონკურენციას ”პორშე ბოქსსტერს” გაუწევს. პირველად ”იაგუარში” ამ როდსტერის წარმოებაზე ჯერ კიდევ 1998 წელს განაცხადეს, როდესაც საზოგადოებამ კონცეპტუალური ”იაგუარ XK180” იხილა.

იაგუარ RD6

..........................................

მაგრამ მალე ეს პროექტი თაროზე შემოდეს, რის მიზეზადაც ფინანსური კრიზისი და საკონვეიეროდ მისი მომზადებისთვის სახსრების უქონლობა გამოცხადდა. ახლა კი, ”ტატა მოტორსმა” პირობა დადო, რომ ხუთი წლის განმავლობაში, ”იაგუარის” განვითარებისთვის წლიურად თითო მილიარდი გირვანქა სტერლინგის ინვესტირებას აპირებს და ბუნებრივია, ინგლისურ კომპანიასაც ხელ-ფეხი გაეხსნება.

შემდეგი სიახლე კომპაქტური X-ტაიპი გახდება. ამ ავტომობილის მთავარი დანიშნულება, ”იაგუარის” წარმოების მოცულობის მნიშვნელოვნად გაზრდა იქნება. ბლუმბერგის მიერ მოპოვებული ინფორმაციით, ახალი X-ტაიპი გარეგნულად კონცეპტუალურ R-D6-ს დაემსგავსება, რომლის დებიუტიც ასევე საკმაოდ შორეულ წარსულში - ფრანკფურტის 2003 წლის მოტორ შოუზე შედგა. თავის დროზე, ამ ავტომობილს კონკურენცია მე-3 სერიის ”ბეემვესთვის” და ”აუდი A4-თვის” უნდა გაეწია, მისი მეშვეობით კი ”იაგუარი” თანდათან გლობალური ბრენდი უნდა გამხდარიყო.

გარდა ამისა, ფორსტერი ადასტურებს იმ ინფორმაციასაც, რომლის მიხედვითაც, ”იაგუარი” სპორტულ სედან XF-ს ბაზაზე, უნივერსალის წარმოებასაც აპირებს. მისი თქმით, XF იმდენად პოპულარულია, რომ მის ბაზაზე სხვადასხვა ძარიანი მოდელების წარმოება გამართლებულია. უნივერსალის გარდა, XF-ს ბაზაზე ასევე კუპეც დამზადდება.

ფორსტერი ასევე ადასტურებს, რომ ”იაგუარ ლენდ როვერი” მალე თავის ერთ-ერთ ბრიტანულ ქარხანას დახურავს. ალბიონზე დღეისათვის ამ ჯგუფის ორი ხარხანა მუშაობს - უესტ მიდლენდსისა და კესტლ ბრომვიჩის. მათ შორის არჩევანს ჯგუფის ხელმძღვანელობა მალე გააკეთებს. ფორსტერის თქმით, უმჯობესია ერთი დიდი ქარხნის შენახვა, ვიდრე ორისა, რომლებიც ნაწილობრივ იქნება დატვირთული.

სამაგიეროდ, მალე გაიხსნება ჩინური ქარხანა, რომელიც თავიდან ”ლენდ როვერის” მოდელებს - ”დეფენდერს”, ”დისქავერის” და ”ფრილენდერს” გამოუშვებს. ”ტატა მოტორსის” შეფი აცხადებს, რომ ჩინეთში ქარხნის ამოქმედება სულაც არ ნიშნავს იმას, რომ ”ლენდ როვერს” თავისი წარმოების ალბიონის მიღმა გატანა სურს. უბრალოდ, ეს ჩინეთის ბაზარზე პოზიციების გასამყარებლად კეთდება.

ახალზელანდიური სუპერ ავტომობილი 600 ცხენის ძალით

BMW — Mon, 31 May 2010 15:07:59 GMT

ერთადერთი მოდელის, ”კანამის” წარმოებას, რასთან დაკავშირებითაც, ამ ავტომოვილზე შეკვეთების მიღების დაწყება გამოაცხადა. ამასთან, კიდევ ერთხელ ითქვა, რომ სულ 200 ცალი ”კანამის” წარმოებაა გათვალისწინებული.

”ჰალმ კან ამი”, რომელსაც ძრავი ბაზაში აქვს განლაგებული, კარბონის კომპოზიტისგან დამზადებულ შასიზე დგას. შასის გარდა, ძარაც კარბონისაა. რაც შეეხება ძრავს, ესაა ”ჯენერალ მოტორსის” წარმოების 7.0-ლიტრიანი V8, რომლის სიმძლავრეც 600 ცხენის ძალას, მაქსიმალური მაბრუნი მომენტი კი 600 ნიუტონმეტრს აღწევს.

ძრავთან შეწყვილებულია 6-საფეხურიანი მექანიკური კოლოფი, თუმცა მყიდველს ოპციის სახით, ამდენივე საფეხურიან სეკვენტალურ კოლოფსაც შესთავაზებენ, რომლის გადამრთველი ნიჩბებიც, ისევე როგორც ფ1-ის ბოლიდებზე, საჭის რგოლის უკან მოთავსდება. ავტომობილის წონა სულ რაღაც 980 კილოგრამია. რა თქმა უნდა, მას შესანიშნავი დინამიკური მახასიათებლები უნდა ჰქონდეს, თუმცა ეს ინფორმაცია რატომღაც არ გავრცელებულა.

ღია ავტომობილს, მძლავრი ძრავის შესაფერისი, ”AP რეისინგის” წარმოების მუხრუჭები აქვს, რომელთა დისკოების დიამეტრიც 362 მილიმეტრია. ”ჰალმ კანამს” წინ 19-დუიმიანი, უკან კი 20-დუიმიანი ბორბლები უყენია, რომლებზეც ”პირელის” წარმოების საბურავებია (Pზერო როსო) ჩაცმული.

”ჰალმ სუპერქარზმა” ასევე გამოაცხადა, რომ მისი სუპერ ავტომობილის შეძენის მსურველებს, დეპოზიტის სახით, 10 000 გირვანქა სტერლინგის გადახდა მოუწევთ. ამ საფასურად, მათ წინასერიული პროტოტიპის ხილვის და მათი ტესტირების საშუალება მიეცემათ. სასურველი ავტომობილი კი მათს ჯიბეს 295 000 გირვანქა სტერლინგით შეამსუბუქებს.

სხვათა შორის, ახალზელანდიური კომპანია, რომელიც ფორმულა ერთის ახალზელანდიელი ჩემპიონის, დენის ჰალმის სახელს ატარებს, თავიდან ”ბეემვეს” წარმოების ძრავის გამოყენება ჰქონდა ჩაფიქრებული. მაგრამ გარდა იმისა, რომ ეს ძრავი ”მოხლოდ” 550 ცხენის ძალას ავითარებს, ის დაახლოებით 100 კილოგრამით მძიმეცაა და უფრო ძვირიც.

”პეჟო” და ”სიტროენი” იაფფასიან ავტომობილს გამოუშვებენ

BMW — Mon, 31 May 2010 15:07:18 GMT

ფრანგულმა საავტომობილო ჯგუფმა ”PSA პეჟო სიტროენმა” დაადასტურა ინფორმაცია იმის შესახებ, რომ დაგეგმილი აქვს ისეთი იაფფასიანი ავტომობილის წარმოება, რომელიც განვითარებადი ეკონომიკის მქონე ქვეყნებში გაიყიდება. გამოქვეყნებულ რელიზში აღნიშნულია, რომ ასეთი ავტომობილი კონკურენციას ამ სეგმენტის პიონერ ”რენო ლოგანს” გაუწევს, მას კი ესპანეთის ქალაქ ვიგოში მოქმედი ქარხანა გამოუშვებს.

ჯერჯერობით, ახალი ავტომობილის შესახებ თითქმის არანაირი ინფორმაცია არ ვრცელდება. ცნობილია მხოლოდ ის, რომ მას ”პეჟოსა” და ”სიტროენის” ბრენდებით გამოუშვებენ. უფრო მეტიც, ფრანგულ გამოცემა ”ლეს ექოსის” ინფორმაციით, ”პეჟოს” მოდელს ამ ეტაპზე, კომპანიაში M3-ს უწოდებენ, ”სიტროენისას” კი - М4-ს. ახალი ავტომობილი ”პეჟო 308-ს” სტილში შესრულდება და ”პეჟო 207-ის” ფასში გაიყიდება.

ვიგოს ქარხნის მოდერნიზაციისთვის, ”PSA პეჟო სიტროენს” 1 მილიარდი ევროს ინვესტირება აქვს განზრახული. სავარაუდოდ, ქარხნის დღიური წარმადობა 900 ავტომობილი იქნება, წლიურად კი იქ დაახლოებით 200 000 ავტომობლის გამოუშვებენ.

ასანიშნავია, რომ ვიგოს ქარხანა ”PSA პეჟო სიტროენის” ქარხნებს შორის უდიდესია. შარშან მან თითქმის 385 000 ავტომობილი გამოუშვა, რომელთა შორისაც ორივე მარკის რამდენიმე მოდელი იყო. ახალი, იაფფასიანი ავტომობილის წარმოება სავარაუდდ 2012 ან 2013 წელს დაიწყება. გასაღების მთავარი ბაზრები კი ახლო აღმოსავლეთი და აფრიკა იქნება, თუმცა მოგვიანებით ის ჩინურ და ბრაზილიურ ბაზრებზეც გამოჩნდება.

”ჯენერალ მოტორსი” როტორულ ძრავიან ”ვოლტს” ცდის

BMW — Mon, 31 May 2010 15:06:39 GMT

”ჯენერალ მოტორსს” გაზრდილი სვლის ჰიბრიდული ავტომობილი ”შევროლე ვოლტი” ჯერ კონვეიერზე არ დაუყენებია, თუმცა მისი მეორე თაობის მოდელის შემუშავება უკვე დაწყებული აქვს. ამ ეტაპზე, განიხილება ამ ავტომობილის წარმოების ხარჯების შემცირების და აქედან გამომდინარე, მისი გასაყიდი ფასის შემცირების გზები.

ერთ-ერთ ასეთ საშუალებად განიხილება 100-ცხენიძალიანი ოთხტაქტიანი ძრავის ნაცვლად, სხვა ტიპის აგრეგატის გამოყენების შესაძლებლობა. ამერიკული კომპანიის ინჟინირინგის და ახალი ტექნოლოგიების განყოფილების შეფი კარლ სტრეიკი აცხადებს, რომ ერთ-ერთ ასეთ ვარიანტად ვანკელის როტორული ძრავი განიხილება. უფრო მეტიც, უკვე შექმნილია მეორე თაობის ”ვოლტის” პროტოტიპი, რომლის ჰიბრიდულ სისტემაშიც სწორედ როტორული აგრეგატი შედის.

”ამ ეტაპზე, ახლანდელი ძრავის როტორულით შეცვლის შესაძლებლობას განვიხილავთ. თუმცა, არაა გამორიცხული, რომ დამხმარე ძრავის მოვალეობა ბენზინის ორცილინდრიანმა აგრეგატმა შეასრულოს, რომლის სიმძლავრეც მხოლოდ 15-18 კილოვატი იქნება. მე უკვე ვატარე როტორულ ძრავიანი ”ვოლტი” და მინდა ვთქვა, რომ ასეთი აგრეგატი ძალიან მცირე რაოდენობით საწვავს მოიხმარს. ამასთან, მას კიდევ ერთი კარგი თვისება აქვს - ძალიან კომპაქტურია”, - ამბობს სტრეიკი.

ის არც დიზელის ძრავის ვარიანტს გამორიცხავს და ამბობს, რომ მართალია, ასეთი აგრეგატები ბენზინისაზე ძვირია, მაგრამ სამაგიეროდ, გაცილებით ნაკლებ საწვავსაც მოიხმარს და საბოლოო ჯამში, მისი ექსპლუატაციაც უფრო იაფი ჯდება.

ახალი შიდაწვის ძრავის შერჩევის გარდა, ”ჯენერალ მოტორსში” აკუმულატორების ღირებულების შემცირების გზებსაც ეძებენ, რაც ყველაზე მეტად აძვირებს ჰიბრიდულსა და ელექტრულ ავტომობილებს. დღეისათვის, ”შევროლე ვოლტის” აკუმულატორების ბლოკის ღირებულება 10 000 დოლარს შეადგენს. მწეარმოებლები იმედოვნებენ, რომ მეორე თაობის ”ვოლტისთვის”, აკუმულატორების ღირებულება განახევრდება.
”ჯენერალ მოტორსი” ჰიბრიდული ”შევროლე ვოლტის” წარმოების დაწყებას ამ წლის ბოლოს აპირებს. ავტომობილს მამოძრავებელ ძალას 150-ცხენისძალიანი ელექტროძრავი ანიჭებს, რომელსაც ელექტროენერგიით ლითიუმ-იონური აკუმულატორების ბლოკი ამარაგებს. საჭიროების შემთხვევაში კი (როცა აკუმულატორები განმუხტულია) საქმეში 1.4-ლიტრიანი ბენზინის ძრავისა და გენერატორის ტანდემი ერთვება, რომელიც აკუმულატორებს ავტომობილის მოძრაობის დროს მუხტავს. ისე კი, მათი დამუხტვა ჩვეულებრივი შტეპსელიდან შეიძლება. შიდაწვის ძრავისა და გენერატორის დაუხმარებლად, ”ვოლტის” სვლის სიშორე 64 კილომეტრია.

”მერსედესის” სახე როჯერ ფედერერი გახდა

BMW — Mon, 31 May 2010 15:05:56 GMT

”მერსედეს-ბენცმა” გამოაცხადა, რომ ჩოგბურთში დიდი სლემის ტურნირების 16-გზის ჩემპიონთან, შვეიცარელ როჯერ ფედერერთან, გლობალურ ბაზარზე პარტნიორობის კომპლექსური კონტრაქტი გააფორმა. მრავალწლიანი ხელშეკრულების მიხედვით, შტუტგარტული ავტო გიგანტი, თავის სარეკლამო რგოლებში ფედერერის იმიჯის გამოყენების უფლებას ღებულობს.

უნდა ითქვას, რომ ”მერსედეს-ბენცსა” და ფედერერს შორის საქმიანი ურთიერთობა დღეს არ იწყება. შვეიცარელი სუპერ ჩოგბურთელი ”სამქიმიანებს” რეკლამას ჩინურ ბაზარზე, რომელიც უკვე მსოფლიოს უდიდესი ბაზარი გახდა, 2008 წლიდან უწევს, ამიერიდან კი მათი პარტნიორობა მსოფლიოს მასშტაბისა იქნება.

გერმანული ავტო გიგანტისთვის, ეს ჩოგბურთში გადადგმული პირველი ნაბიჯები არაა. სპორტის ერთ-ერთ ყველაზე პოპულარულ სახეობაში შტუტგარტელები 16 წელია, რაც მოღვაწეობენ. კომპანია რიგ პოპულარულ ტურნირს აფინანსებს, მათ შორის, არის მასტერსის სერიის დიდი ხნის პარტნიორი. ამ სეზონიდან კი ის აშშ-ის ღია პირველობის სპონსორიც ხდება. ჩოგბურთელების დონეზე, მრავალი წლის განმავლობაში, ”მერსედესის” პარტნიორი ლეგენდარული გერმანელი ბორის ბეკერი იყო.

”მოხარულნი ვართ, რომ სპორტში ”მერსედეს-ბენცის” გლობალური მასშტაბის სახეების დიდ ოჯახს ამიერიდან როჯერ ფედერერიც შეემატა. ეჭვი არაა, ის ყველა დროის ერთ-ერთი საუკეთესო ჩოგბურთელია და მსოფლიოს დონეზე, უამრავი თაყვანისმცემელი ჰყავს. ამიერიდან, როჯერთან ერთად, არაერთ წამოწყებაში მივიღებთ მონაწილეობას. მას საუკეთესო წარსული აქვს, მაგრამ გაცილებით მეტის მიღწევა შეუძლია”, - განაცხადა ”მერსედეს-ბენცის” აშშ-ის შტოს მარკეტინგის საქმეების ვიცე პრეზიდენტმა სტივენ ქენონმა.

”მინი” კიდევ უფრო პატარა ავტომობილების გამოშვებას აპირებს

BMW — Mon, 31 May 2010 15:03:25 GMT

მას შემდეგ, რაც ”ბეემვეს” საკუთრება გახდა, ინგლისური კომპანია ”მინი” სულ უფრო აფართოებს სამოდელო გამას, რისი წყალობითაც, წარმოებას და გაყიდვებს ზრდის. თუმცა, როგორც ჩანს, მის ხელმძღვანელობას და ბავარიულ კომპანიას, ეს აღარ აკმაყოფილებს, რის გამოც, მინიავტომობილების მწარმოებელი ბრენდი თავისი საწარმოო პროგრამის გაფართოებას გეგმავს.

”მინის” ხელმძღვანელობა კიდევ უფრო პატარა ავტომობილების წარმოების მიზანშეწონილობას სწავლობს, ავტომობილისა, რომლითაც კონკურენცია ”დაიმლერის” ”სმარტს” უნდა გაუწიოს. ამასთან, ეს ”ბეემვბეს პროექტ ”მეგასიტის” ფარგლებში მოხდება. ამასთან, რაოდენ გასაკვირიც უნდა იყოს, ჯუჯა ავტომობილის წარმოებისას, მაქსიმალურად გამოიყენებენ იმ მაკომპლექტებლებს, რომლებსაც ბავარიელები თავიანთი სხვა ავტომობილებისთვის იყენებენ.

არადა, ”მინის” ხელმძღვანელობა კარგა ხანს გულმოდგინედ ამტკიცებდა, რომ მის სამკარიან მოდელზე პატარა ზომის ავტომობილებს, მისი მწარმოებლისთვის მოგების მოტანა არ შეუძლია. და ახლაც, მთავარი დამაბრკოლებელი სწორედ ეს საკითხია. ”ერთადერთი კითხვა, რომელსაც საკუთარ თავს ვუსვამთ, ისაა, თუ რამდენად მომგებიანი შეიძლება იყოს ჩვენთვის მინიზე პატარა ავტომობილის წარმოება”, - ინგლისურ გამოცემა ”ავტოქართან” საუბრისას განაცხადა ”მინის” ინკოგნიტო წარმომადგენელმა.

მაგრამ მას შემდეგ, რაც ”ბეემვემ” სამცილინდრიანი ძრავის წარმოება გადაწყვიტა და სულ უფრო მეტ ყურადღებას უთმობს ეკონომიური ავტომობილების წარმოების პერსპექტივას, ”მინისთვის” ჯუჯა ავტომობილის წარმოების იდეა სულ უფრო მიმზიდველად და პერსპექტიულად გამოიყურება.

იმავე წყაროს ცნობით, ჯერჯერობით, გადაწყვეტილი არაფერია. ჯუჯა ავტომობილის პროექტი საწყის ეტაპზეა. სავარაუდოდ, დაახლოებით მომავალი წლის ფრანკფურტის საავტომობილო გამოფენისთვის, პირველი კონცეპტუალური მოდელის მომზადება მოესწრება.

ჯერ გადაწყვეტილი არაა, ავტომობილი ორადგილიანი იქნება, თუ ოთხიანი, ძრავი წინ განლაგდება, თუ უკან. სამაგიეროდ, უკვე გადაწყვეტილია, რომ მისი იგრძე არ უნდა იყოს 3.050 მეტრზე მეტი არ უნდა იყოს. სწორედ ეს სიგრძე ჰქონდა პირველ ”მინის”, რომელიც ლეგენდარულმა ინჟინერმა ალექს ისიგონისმა დააპროექტა. ამგვარად, ჯუჯა ”მინი” ახლანდელ მოდელთან შედარებით, 0.700 მეტრით მოკლე და ”სმარტთან” შედარებით, 0.300 მეტრით გრძელი იქნება.

ინტერნეტით გავრცელებულ ერთ-ერთ ინფორმაციაში, ”მინის” ჯუჯა მოდელის სახელად ”მინორია” დასახელებული. თუმცა, ეს დაუდასტურებელი ინფორმაციაა. აქ მოყვანილ ფოტოზე გამოსახულია ”მინის” კონცეპტუალური მოდელი ”სპირიტუალი”, რომელიც ინგლისურმა კომპანიამ 1997 წელს, ”ბეემვეს” მიერ მისი შეძენიდან სამი წლის შემდეგ მოამზადა.

”ჯულიეტა” – ”ალფა რომეოს ახალი ფლაგმანი

BMW — Sat, 06 Mar 2010 09:09:50 GMT

ჟენევის საავტომობილო შოუზე, ”ფიატის” საავტომობილო ჯგუფში შემავალმა კომპანია ”ალფა რომეომ” თავისი ახალი ფლაგმანი მოდელი - ჰეჩბეკი ”ჯულიეტა” წარადგინა, რომლითაც მილანური კომპანიის გამოცოცხლება უნდა დაიწყოს. სავარაუდოდ, სწორედ ”ჯულიეტა” გახდება ის ავტომობილი, რომლითაც ”ალფა რომეო” ამერიკის ბაზარს დაუბრუნდება. ცნობისათვის, იტალიურმა კომპანიამ აშშ-ის ბაზარი 1985 წელს დატოვა.

”ფიატი” ”ალფა რომეოს” ახალ სტრატეგიას მალე გამოაქვეყნებს. ანალიტიკოსები დარწმუნებულნი არიან, რომ მილანური ასწლოვანი ავტომწარმოებლის ფეხზე დადგომის საქმეში, მთავარი როლი სწორედ ”ჯულიეტას” დაეკისრება. ”ფიატის” მთავარმა აღმასრულებელმა სერჯო მარკიონემ იანვარში განაცხადა, რომ მისი კომპანია ”ალფა რომეოს” გაყიდვას არ აპირებს და აქციონერებს აღუთქვა, რომ მალე მის ახალ სამოქმედო სტრატეგიას გამოაქვეყნებს.

”კრედიტ სუისის” ანალიტიკოსი სტიუარტ პერსონი აცხადებს, რომ ”ალფას” ასაღორძინებლად მთავარი წარმოების რაოდენობის გაზრდა არ იქნება. მთავარია ხარისხი და ეს ბრენდი იმ შემთხვევაშიც გახდება კონკურენტუნარიანი, თუ წარმოების მოცულობას რამდენიმე ასეული ათასის ფარგლებში შეინარჩუნებს. სხვათა შორის, თავის დროზე სწორედ საკითხისადმი ამგვარი მიდგომით განვითარდა სამი გერმანული პრემიუმ ბრენდი (მერსედესი, ბეემვე და აუდი), რომლებიც უკვე წარმოების მილიონიან ზღვარს გასცდნენ.

შარშან ”ალფა რომეომ” მთელს მსოფლიოში 110 000 ავტომობილი გაჰყიდა, საიდანაც უმეტესობა ევროპაში დარჩა. გაყიდვების გაზრდის საშუალება შეიძლება გახდეს ამერიკულ ბაზარზე დაბრუნება, თუმცა ეს 2012 წლამდე არ იგეგმება.

”ალფა რომეო” ”ფიატის” ჯგუფში 1986 წლიდან შედის და იქიდან მოყოლებული, მისი გაყიდვები თითქმის ყოველწლიურად კლებულობს, რის გამოც, ტურინელები მის გაუქმებასაც კი ფიქრობდნენ, თუმცა მარკიონემ მილანელებს ბოლო შანსი მისცა. თუმცა ანალიტიკოსების უმეტესობა ასეთ რადიკალურ ნაბიჯს მაინც არ ელოდა.

სხვათა შორის, მარკიონე ”ალფა რომეო ჯულიეტას” ჟენევურ პრეზენტაციას არ დასწრებია. ამ დროს ის ბრაზილიაში იმყოფებოდა, სადაც ”ფიატმა” თავის ბრაზილიურ კომპანია CNH-ის ახალი ქარხნის გახსნის ცერემონიაში მიიღო მონაწილეობა. ქარხანა, რომლის მშენებლობაც 557 მილიონი დოლარი დაჯდა, სასოფლო-სამეურნეო მანქანა-დანადგარების წარმოებაზეა სპეციალიზებული. მარკიონეს გარდა, მის გახსნას ბრაზილიის პრეზიდენტი ლუის ინასიო ლულა და სილვაც დაესწრო. ცნობისათვის, ბრაზილიის ეკონომიკის სოფლის სექტორი სწრაფი ტემპით ვითარდება, მისთვის საჭირო მანქანა-დანადგარების ბაზრის 24.5 პროცენტს კი ”ფიატი” აკონტროლებს.

სხვათა შორის, ბრაზილიის ეკონომიკური რეცესია შედარებით მცირე ხანს გაგრძელდა და შარშან, იქაურ ავტო ბაზარზე გაყიდვების 11.4-პროცენტიანი ზრდა დაფიქსირდა. ტურინულ ავტო გიგანტს კი ამ ბაზარზე სოლიდური წილი უკავია.

”პორშეს” ახალი ”კაიენი” ჰიბრიდული გახდა

BMW — Wed, 03 Mar 2010 22:17:06 GMT

მას შემდეგ, რაც ინტერნეტით ”ფოლკსვაგენის” მეორე თაობის ”ტუარეგის” შესახებ ინფორმაცია გავრცელდა, საავტომობილო სამყარო მოუთმენლად ელოდა ამ ავტომობილის ახლო ნათესავის, ”პორშე კაიენის” განახლებას. და აი, ჟენევის ავტო შოუზე ისიც გამოჩნდა. და თანაც ისეთი, როგორსაც ბევრი არ ელოდა - გარეგნულადაც გვარიანად გადახალისებული და რაც მთავარია, კაპოტქვეშ ჰიბრიდული აგრეგატით. ახალი კაიენი უფო კომფორტული, ახალი სისტემებით აღჭურვილი, უფრო ეფექტური, მძლავრი, სპორტული და ეკონომიური, აქედან გამომდინარე კი გარემოსადმი მეგობრულია.

პირველ რიგში, ახალი ”კაიენის” გარეგნობას შევეხოთ. წინიდან ის პირველი თაობის ”კაიენს” ასეთუისე, ჰგავს, უკნიდან კი სულ სხვაა. უპირველესად კი უნდა ითქვას, რომ ამ უგზოობის ავტომობილს ამიერიდან უფრო სპორტული იერი აქვს. ყურადღებას მისი ”რბილი” ფორმები იქცევს, თუმცა ისიც ფაქტია, რომ რადიატორის ახალი ბადის და კაპოტზე ამონაბორცვის წყალობით, მან აგრესიული გამომეტყველებაც მიიღო. მთავარი კი ისაა, რომ ამიერიდან, ეს მოდელი კიდევ უფრო დაუახლოვდა ”პორშეს” კორპორატიულ სტილს.

მოსალოდნელი იყო, რომ თანამედროვე ავტოინდუსტრიის ტრენდის შესაბამისად, ახალი ”კაიენი” ზომებშიც მოიკლებდა და წონაშიც. მაგრამ მთლად ასე არ მოხდა: წინამორბედთან შედარებით, ის 180 კილოგრამით მსუბუქია. არადა, ჰიბრიდული აგრეგატის გამო, უნდა დამძიმებულიყო. ავტომობილი სიგრძეში 4.8 სანტიმეტრით დაგრძელდა, ბორბლებს შორის ბაზა კი 4.0 სანტიმეტრით გაიზარდა. ეს კი იმისათვის გაკეთდა, რომ სალონში უკანა სავარძლების მგზავრებისთვის სივრცე გაზრდილიყო.

რადიკალურად შეიცვალა სალონი, რომელიც ახლა უფრო ოთხკარიან კუპე ”პანამერას” ინტერიერს მოგვაგონებს. ცენტრალური კონსოლი ძალიან ამაღლებულია, რითაც სპორტული ავტომობილის კოკპიტის შთაბეჭდილებას ქმნის. დამხმარე მოწყობილობათა მართვის ძირითადი ელემენტები სწორედ მასზეა თავმოყრილი. მთავარ პანელზე კი უზარმაზარი მონიტორი მოკალათებულა, რომელსაც მრავალი ფუნქცია ეკისრება. უკანა სავარძლები გრძივად, 160 მილიმეტრზე გადაადგილდება. სამ საფეხურად რეგულირდება მათი საზურგის დახრა.

ახლა კი მთავარზე. რა თქმა უნდა, ეს ”პორშეს” ჰიბრიდული სისტემაა. მასში გაერთიანებულია V6 კონფიგურაციის 3.0-ლიტრიანი ტურმოძრავი, რომლის სიმძლავრეც 333 ცხენის ძალას აღწევს. მასთან ერთად მუშაობს 34-კილოვატიანი (47 ცხენის ძალა) ელექტროძრავი. ჰიბრიდული დანადგარის ჯამური სიმძლავრე 380 ცხენის ძალას, მაქსიმალური მაბრუნი მომენტი კი 580 ნიუტონმეტრს შეადგენს. სხვათა შორის, ეს მომენტი უკვე 1000 ბრ/წთ-ზე მიიღწევა. მართალია, ავტომობილის დინამიკური მახასიათებლები ჯერ არ გამოქვეყნებულა, მაგრამ მწარმოებელი აცხადებს, რომ ახალი ”კაიენი” ამ მაჩვენებლით, თავისი წინამორბედის ყველაზე მძლავრი, S-ვერსიის დონეზეა, რომლის კაპოტის ქვეშაც V8 ძრავია განლაგებულ

შიდაწვის და ელექტრო ძრავები ერთმანეთთან დამაშორებელი ქუროთია დაკავშირებული. მისი წყალობით, ავტომობილი მბიძგველ ძალას ან მარტო შიდაწვის ძრავისგან ღებულობს, ან მარტო ელექტროძრავისგან, ან კი ორივესგან ერთდროულად. როდესაც საქმეში მხოლოდ ელექტროძრავია ჩართული და ეს ყველაზე ხელსაყრელი ქალაქში მოძრაობისასაა, ”კაიენის” მაქსიმალური სიჩქარე სულ რაღაც 60 კმ/სთ-ია. რა თქმა უნდა, ამ დროს ავტომობილი უხმაუროდ მოძრაობს და მას ნულვანი გამონაბოლქვი აქვს. სამწუხაროდ, ”პორშე” ჯერჯერობით არ აზუსტებს, რამდენის გავლაა შესაძლებელი მხოლოდ ელექრტოძრავით. სხვათა შორის, ელექტროძრავს ამაჩქარებლის ფუნქციაც აქვს და ეს განსაკუთრებით საჭირო გასწრების მანევრის შესრულების დროსაა.

ძრავების დამაკავშირებელ ქუროს სხვა ბევრი ფუნქციაც აქვს. მაგალითად, წინასწარ მიცემული ბრძანების შემთხვევაში, მას შეუძლია, გათიშოს შიდაწვის ძრავი, როდესაც ავტომობილის სიჩქარე 156 კმ/სთ-ზე მეტი არაა. ეს მაშინვე მოხდება, როგორც კი მძღოლი აქსელერატორის სატერფულიდან ფეხს აიღებს. ამ დროს, მინიმალური იქნება თვითდამუხრუჭების ეფექტი, რისი წყალობითაც, ავტომობილის ეკონომიურობა მნიშვნელოვნად უმჯობესდება.

შიდაწვის ძრავთან დაკავშირებულია უახლესი, 8-საფეხურიანი გადაცემათა კოლოფი ტიპტრონიკ S-ი, რომელიც გადაცემის საფეხურების შეცვლის შემცირებული დროით გამოირჩევა, რითაც ასევე გაუმჯობესებულია ავტომობილის ეკონომიურობა. ამავე მიზანს ემსახურება სისტემა ”აუტო სტარტ სტოპიც”. თავისუფალი სვლის დროს კი სპეციალური სისტემა ძრავისთვის საწვავის მიწოდებას წყვეტს. ყველაფერ ამის შედეგი გასაოცარია - შერეული ციკლით მოძრაობისას, 100 კილომეტრის გასავლელად, ახალ ”კაიენს” სულ რაღაც 8.2 ლიტრი ბენზინი ჰყოფნის, რაც წინა მოდელის ხარჯთან შედარებით, თითქმის 24 პროცენტით ნაკლებია.

ჰიბრიდულის გარდა, ”პორშე” თავის მყიდველს ჩვეულებრივ მოდელებსაც შესთავაზებს, რომლებიც წინამორბედებთან შედარებით, ასევე გაუმჯობესებული ეკონომიურობით გამოირჩევიან. მათგან ყველაზე სუსტი არის 3.6-ლიტრიანი V6, ყველაზე მძლავრი კი 4.8-ლიტრიანი V8, რომელსაც წყვილი ტურბოკომპრესორი ემსახურება და რომლის მაქსიმალური სიმძლავრეც 500 ცხენის ძალას აღწევს. ამ უკანასკნელით აღჭურვილი ”კაიენის” ხარჯი 11.5 ლიტრია, რაც წინამორბედთან შედარებით, თითქმის 24 პროცენტით ნაკლებია. ბენზინის ძრავების გამაში მეოთხე აგრეგატია 4.8-ლიტრიანი ატმოსფერული V8, რომლის სიმძლავრეც 400 ცხენის ძალაა. ახალ ”კაიენს” ასევე მოემსახურება 4.8-ლიტრიანი V8 დიზელი, რომელიც 240 ცხენის ძალას და 550 ნიუტონმეტრ მომენტს ავითარებს, მისი მეშვეობით კი ავტომობილის ხარჯი სულ რაღაც 7.4 ლიტრია.

ევროპის ბაზარზე ”პორშე” ახალი ”კაიენის” გაყიდვას 8 მაისს დაიწყებს.

”ლანჩა მუსას” მსოფლიო დებიუტი ჟენევაში შედგება

BMW — Wed, 03 Mar 2010 22:10:57 GMT

ჟენევის საავტომობილო შოუს დამთვალიერებელი პირველად გახდება იტალიური ”ლანჩასა” და ამერიკული ”კრაისლერის” ალიანსის მოწმე. ორივე კომპანია, რომლებიც ”ფიატის” ჯგუფში არიან გაერთიანებული, ”ექსპო სენტერში” ერთ პავილიონში დააყენებს თავის ავტომობილებს, რომელთაგან სრულიად ახალი მხოლოდ სუბკომპაქტური ”ლანჩა მუსა” იქნება.

ეს ავტომობილი ჯერ მხოლოდ წინასერიულია, თუმცა მისი გაყიდვები წელსვე, პარიზის ავტო შოუს შემდეგ დაიწყება. ის მულტიჯეტის სერიის 1.3-ლიტრიანი ბენზინის ძრავითაა აღჭურვილი, რომელიც 95 ცხენის ძალას იძლევა და რაც მთავარია, ევრო5 სტანდარტს შეესაბამება. ავტომობილი სტარტ-სტოპ სისტემითაა აღჭურვილი, რაც საწვავის ხარჯის და გამონაბოლქვში ნახშირორჟანგის შემცველობის შემცირებას უწყობს ხელს. ”მუსა”, რომლის ძრავის მაბრუნ მომენტსაც მექანიკური კოლოფი გადაამუშავებს, კილომეტრის გავლისას, ატმოსფეროში 114 გრამ ნახშირორჟანგს გამოჰყოფს, რობოტიზებული კოლოფის შემთხვევაში კი ეს მაჩვენებელი 109 გრამია.

მუსას გარდა, ”ლანჩასა” და ”კრაისლერის” პავილიონში ასევე წარმოდგენილი იქნება ერთ მხარეს ორი ”ლანჩა დელტა” და მეორე მხარეს - ორი ”კრაისლერ 300C”. ”მუსას” სიახლოვეს კი მინი ჰეჩბეკ ”იპსილონის” სპეციალური, ორ ფერში შეღებილი ვერსია ”იპსილონ ელ” მოთავსდება, რომელსაც ”ლანჩა” შეზღუდული რაოდენობით გამოუშვებს.

”სუბარუს” ჰიბრიდი ჟენევაში

BMW — Wed, 03 Mar 2010 22:09:44 GMT

სხვა ავტომწარმოებლების მსგავსად, გარემოზე მზრუნველობას იაპონური ”სუბარუც” იჩენს, რომელიც ჟენევაში რამდენიმე ეკოლოგიურ ინოვაციას გამოფენს, მისი მთავარი ექსპონატები კი კონცეპტუალური ”ჰიბრიდ ტურერი” და ელექტრული საქალაქო ავტომობილი იქნება.

”ჰიბრიდ ტურერი” მსოფლიოში პირველი ჰიბრიდული ავტომობილია, რომლის ჰიბრიდულ სისტემაშიც ოპოზიტური ძრავი, ეგრეთ წოდებული ”ბოქსერი” მუშაობს. ესაა 2.0-ლიტრიანი ტურბომოტორი, რომელთან ერთადაც, ორი ელექტროძრავიც მუშაობს. მათგან ერთი - 10-კილოვატიანი წინა ღერძს ემსახურება, უკანა კი, რომლის სიმძლავრეც 20 კილოვატია - უკანებს. ჰიბრიდული სისტემა, ”სუბარუს” ავტომატურ ტრანსმისია ”ლაინეატრონიკთანაა” დაკავშირებული.

ძნელი მისახვედრი არ უნდა იყოს, რომ ელექტროძრავებს მხოლოდ სტარტზე და დაბალი სიჩქარით მოძრაობისას უწევთ მუშაობა. ეს კი ავტომობილის საცობებში მოძრაობისას იქნება გამოსადეგი. და თუ საჭიროა მ აღალი სიმძლავრის განვითარება, საქმეში შიდაწვის ძრავი ჩაერთვება.

თავისი ჰიბრიდული დანადგარის გარდა, ”ჰიბრიდ ტურერი” გარეგნობითაც გამოირჩევა. ჯერ ერთი, ის ”სუბარუს” სხვა მოდელებს არ ჰგავს. მეორეც, მას ეგრეთ წოდებული ”თოლიას ფრთების” ტიპის კარებები აქვს, რომლებსაც საყრდენები სახურავზე აქვთ და ქვევიდან ზევით იღება. მათი მეშვეობით, ავტომობილის სალონში მოხვედრა მნიშვნელოვნად გაადვილებულია.
ელექტრომობილს ”სტელა EV” ჰქვია და ის პლაგ-ინ სისტემითაა აღჭურვილი. მასშიც ელექტროძრავს ლითიუმ-იონური აკუმულატორების ბლოკი კვებავს, რომელში დაგროვილი ენერგიაც საკმარისია იმისათვის, რომ ავტომობილმა შეუჩერებლად 90 კილომეტრის გავლა შესძლოს. ავტომობილს აქვს აკუმულატორების სწრაფად დამუხტვის სისტემა, რომლის მეშვეობითაც, 15 წუთში აკუმულატორები ენერგიის მარაგის 80 პროცენტს ივსებენ. ისე კი, საყოფაცხოვრეპო ქსელით სარგებლობის შემთხვევაში, სკუმულატორების სრულად დამუხტვისთვის 5 საათია საჭირო.

”ფოლკსვაგენი” დივიზიონ ”ელექტრიკ მოტორსს” აყალიბებს

BMW — Wed, 03 Mar 2010 22:08:55 GMT

”ჯენერალ მოტორსის” მსგავსად, ”ფოლკსვაგენიც” სპეციალურ დივიზიონ ”ელექტრიკ მოტორსს” აყალიბებს, რომელსაც მხოლოდ ელექტრომობილების და მათთვის საჭირო ძალური დანადგარების შემუშავება დაევალება. გერმანული ავტოგიგანტი მსოფლიო ლიდერობას აპირებს და ახალ დივიზიონს, ამ მიზნის მიღწევაში ჯერ მხოლოდ მოკრძალებული როლი ექნება. თუმცა, დროთა განმავლობაში, ის ვოლფსბურგული საავტომობილო ჯგუფის საქმიანობაში ერთ-ერთი მთავარი როლი მიენიჭება.

იმის გამო, რომ ”ფოლკსვაგენის” ჯგუფში რამდენიმე კომპანია შედის, ახალი დივიზიონის მიერ შემუშავებულ ძრავებზე დიდი მოთხოვნილება იქნება, რაც მის კონკურენტულ ფასს წარმოქმნის. ამას კი ახალი ტექნოლოგიების ათვისებისას, დიდი მნიშვნელობა ექნება. რა თქმა უნდა, ამავე დივიზიონის მიერ შემუშავებულ აგრეგატებს ნათესავი ”აუდის” მსგავსი შტო - ”ე-ტრონი” გამოიყენებს, რომელიც სპეციალურად, ელექტრომობილების წარმოებისთვისაა შექმნილი და რომელიც ამ ინდექსით მოდელების მთელ გამას გამოუშვებს.

ელექტრონული ძრავების წარმოება, ”ფოლკსვაგენის” ზალცინგერის (გერმანია) ქარხანას დაევალება. პირველი ავტომობილი, რომელიც ამ ქარხანაში წარმოებულ ელექტროძრავებს გამოიყენებს, არის მინიავტომობილი E-UP, რომელიც მომავალი ”ლუპოს” ელექტრული ვერსია გახდება და რომლის სერიული წარმოებაც 2013 წელს დაიწყება.

ამ ავტომობილის კონცეპტუალური ვერსია ვოლფსბურგელებმა პირველად ფრანკფურტის შარშანდელ მოტორ შოუზე გვაჩვენეს. ამ ავტომობილის სიგრძე 3.19 მეტრი, სიგანე 1.64 მეტრი, სიმაღლე 1.47 მეტრი, ბაზა კი 2.19 მეტრია. მასში 80 -ცხენისძალიან ელექტროძრავს ენერგიით ლითიუმ-იონური აკუმულატორების ბლოკი კვებავს. მწარმოებლის განცხადებით, E-UP ადგილიდან 100 კმ/სთ სიჩქარემდე აჩქარებას 11.3 წამში შეძლებს, 50 კმ/სთ-მდე აჩქარებისთვის კი 3.5 წამია საკმარისი.

ცნობისათვის, ერთი თვის წინ, ”ჯენერალ მოტორსმა” გამოაცხადა, რომ ახალ გეგმაში, რომლის მიზანიც ავტომობილებისათვის გამოსადეგი ელექტრული ძრავების წარმოებაა, 246 მილიონი დოლარის ინვესტიციას ჩადებს. ეს ინვესტიცია კი ბალტიმორის სატრანსმისიო ქარხნის მოდერნიზებას ითვალისწინებს, რომელიც ელექტროძრავების წარმოებას 2013 წელს დაიწყებს.

”ისპანო სუიზა” ბრუნდება

BMW — Wed, 03 Mar 2010 22:05:28 GMT

შესაძლოა, ეს სახელი დღეს ბევრს არაფერს გეუბნებათ, მაგრამ იყო დრო, როდესაც მისი მატარებელი ავტომობილები, ”ბუგატიზე” არანაკლები პოპულარობით სარგებლობდა. დღეს ”ისპანო სუიზას” შესახებ მხოლოდ ავტო ”გურმანებმა” და ავტო კოლექციონერებმა თუ იციან. მაგრამ შორს არაა ის დრო, როდესაც ამ ლეგენდარულ სახელს ბევრი გაიგებს და ეს ჟენევის საავტომობილო შოუზე მოხდება.

შოუს დამთვალიერებელი იხილავს ”ისპანო სუიზას” სახელის მქონე კონცეპტუალურ ავტომობილს, რომელიც რეალურად, ”აუდი R8 V10-ს” რესტაილინგური ვარიანტია და რა თქმა უნდა, მისივე პლატფორმას და აგრეგატებს იყენებს. ოღონდ, ეს აგრეგატები მნიშვნელოვნად მოდერნიზებულია.

ძრავს მექანიკური დამჭირხნი ემსახურება. ამ და სხვა მოდიფიკაციების წყალობით, მისმა სიმძლავრემ 750 ცხენის ძალას მიაღწია. ჯერჯერობით, ამ ავტომობილის შესახებ, მხოლოდ ტექნიკური მონაცემია ცნობილი. სამაგიეროდ, ესპანურ-ფრანგული ფირმა გვამცნობს, რომ ამ ძრავის მეშვეობით, ავტომობილი, რომლის სახელიც კი, ჯერჯერობით უცნობია, ადგილიდან 100 კმ/სთ სიჩქარეს 3.4 წამში ავითარებს, მისი მაქსიმალური სიჩქარე კი 330 კმ/სთ-ს აღწევს.

გარდა ამისა, ინტერნეტით გავრცელდა ინფორმაცია იმის შესახებ, რომ ”ისპანო სუიზა” თავისი ავტომობილის ჰიბრიდული აგრეგატით აღჭურვასაც გეგმავს, რომლის მეშვეობითაც, მნიშვნელოვნად გაიზრდება ძრავების ჯამური სიმძლავრე. ზოგიერთი მონაცემით, ჰიბრიდული დანადგარი ავტომობილს დამატებით 150 ცხენის ძალას მისცემს. გარდა ამისა, შესაძლებელი იქნება მხოლოდ ელექტროძრავის ხარჯზე გადაადგილება.

ჯერჯერობით, სულ ესაა, უფრო მეტს კი ჟენევის ავტო შოუს დღეებში შევიტყობთ.

X5

BMW — Wed, 03 Mar 2010 21:50:18 GMT

X5 უძლიერესი ჯიპია. საწვავის ტიპი აირს დიზელი. გადაცემათა კოლოფი ტიპტრონიკი. ძრავის მოცულობა 2500. ABS გააჩნია, ელ.შუშები გააჩნია, კონდიციონერი გააჩნია, კლიმატკონტროლი გააჩნია, ტყავის სალონი აქვს, დისკები აქვს , ნავიგაცია გააჩნია, ცენტრალური საკეტი აქვს, ლუქი აქვს, სიგნალიზაცია აქვს, ბორდკომპიუტერუ აქვს, ჰიდრავლიკა აქვს, სავარძლის გათბობა აქვს, პარკინგკონტროლიც აქვს. ახალი გამოშვებული მანქანის ფასი საშუალოდ 30 000$-ია

”აუდი A1” კონკურენციას ”ბეემვეს” ”მინის” გაუწევს

BMW — Mon, 15 Feb 2010 12:40:28 GMT

”აუდიმ” ინტერნეტით თავისი სრულიად ახალი ავტომობილის, კომპაქტურ ჰეჩბეკ A1-ის ფოტოები და ზოგადი ინფორმაცია გამოაქვეყნა და გამოაცხადა, რომ ამ ავტომობილით, კონკურენციას გაუწევს ისეთ სერიოზულსა და პოპულარულ მეტოქეს, როგორიც ”ბეემვეს” რეტრო-სტილის ”მინია”.

ახალი ავტომობილის გაყიდვები ევროპულ ბაზარზე მაისში დაიწყება, სადაც ის 16 000 ევროდ გაიყიდება. შედარებისთვის, ”მინის” ევროპული ფასი ოდნავ მაღალი - 16 600 ევროა. ეს გარემოება კი ინგოლშტადტელებს იმედს აძლევს, რომ მათი ახალი ავტომობილი ისეთივე პოპულარული გახდება, როგორიც ”მინია”.

”აუდი A1-ის” ძრავების გამაში ჯერჯერობით მხოლოდ ოთხი აგრეგატია - ორი ბენზინის და ამდენივე დიიზელის. ამასთან, ჰეჩბეკის საბაზო აღჭურვაში შედის საწვავის დამზოგავი სტოპ-სტარტ სისტემა და მუხრუჭების ენერგიის რეგენერაციის სისტემა.

ყველაზე ეკონომიური A1 აღჭურვილია 90-ცხენისძალიანი 1.6-ლიტრიანი დიზელით, რომელიც ”ფოლკსვაგენ გოლფზეც” გამოიყენება. ეს ძრავი, ყოველი კილომეტრის გავლისას, ატმოსფეროში მხოლოდ 99 გრამ CO2-ს გამოჰყოფს და 100 კილომეტრს სულ რაღაც 3.8 ლიტრი საწვავით გადის.

საბაზო ძრავი კი 1.2-ლიტრიანი ბენზინის აგრეგატია, რომლის სიმძლავრეც სულ რაღაც 86 ცხენის ძალას შეადგენს. ამ ძრავით აღჭურვილ ავტომობილს 100 კილომეტრის გასავლელად 5.1 ლიტრი ბენზინი ჰყოფნის, ყოველ კილომეტრზე კი ის გარემოს 119 გრამი ნახშირორჟანგით აბინძურებს. შედარებისთვის, ”მინის” მსგავსი მონაცემების მქონე აგრეგატი 1.6-ლიტრიანი ძრავია, რომლის სიმძლავრეც 98 ცხენის ძალაა. 100 კილომეტრზე მისი ხარჯი 5.4 ლიტრია, გამონაბოლქვში ნახშირორჟანგის შემცველობა კი კილომეტრზე 127 გრამს აღწევს.

”აუდი A1-ის” მსოფლიო დებიუტი ჟენევის საავტომობილო გამოფენაზე გაიმართება. ეს ავტომობილი ”ფოლკსვაგენის” სუბკომპაქტურ ჰეჩბეკ ”პოლოს” პლატფორმაზეა ბაზირებული და მას ”აუდის” ბრიუსელის (ბელგია) ქარხანა გამოუშვებს. დასაწყისში, ბაზარზე A1-ის სამკარიანი ვერსია გამოვა, მოგვიანებით კი მას ხუთკარიანი ვარიანტიც მოჰყვება.

ჰეჩბეკი A1 ”აუდის” იმ გეგმის ერთ-ერთი მთავარი პერსონაჟია, რომლის მიხედვითაც, ინგოლშტადტელებს გაყიდვების მოცულობით ორი მთავარი გერმანული კონკურენტის - ”ბეემვეს” და ”მერსედეს ბენცის” უკან ჩამოტოვება და პრემიუმ კლასში მსოფლიო ლიდერობა აქვთ განზრახული.

სამოდელო გამაში სუბკომპაქტური A1-ის და დიდი ზომის ოთხკარიან კუპე A7-ის დამატებით, ”აუდი” თავის წლიურ გაყიდვებს 2015 წელს 1.5 მილიონ ავტომობილამდე გაზრდის. შედარებისთვის, გერმანულმა კომპანიამ შარშან სულ 949 700 ავტომობილის გაყიდვა შეძლო.

”აუდი” იმედოვნებს, რომ წლიურად 80 000 A1-ის გაყიდვას შესძლებს. წინასწარი ვარაუდით, მყიდველთა უმეტესობა ქალაქში მცხოვრები ახალგაზრდობა (25-35 წლის) იქნება, რომლებიც ”მინის” რეტრო სტილზე მაღლა ”აუდის” სუბკომპაქტის თანამედროვე სტილს დააყენებენ.

”აუდის” ამ ეტაპზე A1-ის მხოლოდ ევროპის ბაზარზე გაყიდვა აქვს დაგეგმილი. ”აუდი ოფ ამერიკას” პრეზიდენტ იოჰან დე ნისხენს ნათქვამი აქვს, რომ მისი კომპანია მეორე თაობის A1-ს ამერიკაშიც გაჰყიდის, თუმცა ამ ავტომობილს გერმანული კომპანია უახლოესი რვა წლის განმავლობაში არ გამოუშვებს.

”ნისანი” ახალ ქროსოვერზე დიდ იმედებს ამყარებს

BMW — Mon, 15 Feb 2010 12:36:40 GMT

”ნისან მოტორი” იმედოვნებს, რომ მისი უახლესი კომპაქტური ქროსოვერი ”ჯუკი” ევროპაში ისეთივე პოპულარული იქნება, როგორიც მასზე ოდნავ დიდი ”ქაშკაია”. ”ჯუკის” მსოფლიო პრემიერა ჟენევის ავტო შოუზე გაიმართება, მის გაყიდვებს კი იაპონური კომპანია სექტემბრის ბოლოს დაიწყებს.

”ამ მანქანას ფართო სალონიც აქვს და იმევდროულად ის კომპაქტურია. ის ერთი შეხედვით ახოვანიც მოჩანს, თუმცა იმავდროულად, ძალიან დინამიურიცაა. პრაქტიკულიცაა და ახალგაზრდულიც. ეს ის თვისებებია, რომლებიც თითქოს, ერთმანეთს ეწინააღმდეგება, თუმცა ყველა ”ჯუკს” ახასიათებს და მთლიანობაში, რაღაც უნიკალურს ქმნის”, - თავისი კომპანიის სიახლე ასე უცნაურად დაახასიათა ”ნისან იუროპის” ვიცე პრეზიდენტმა პიერ ლოინგმა, ვინც პროდუქციის დაგეგმვაზეა პასუხისმგებელი.

”ჯუკი” იაპონური კომპანიის ევროპულ დიზაინ ცენტრის სპეციალისტებმა, ლონდონში შეიმუშავეს, ამ ავტომობილს კი ”ნისანის” ოპამას (იაპონია) და სანდერლენდის (ბრიტანეთი) ქარხნები გამოუშვებს. სხვათა შორის, ”ქაშკაისაც” სანდერლენდის საწარმო უშვებს, რომელსაც, ამ ქროსოვერზე არსებული მზარდი მოთხოვნის გამო, უკვე სამ ცვლაში ამუშავებენ.

ცნობისათვის, ბოლო წლებში, ”ნისანი” თავის ევროპუკ ბიზნესში აქცენტს ქროსოვერებზე აკეთებს, რადგან ძველ კონტინენტზე მისი სედანები დიდი პოპულარობით ვერ სარგებლობს. სწორედ ქროსოვერების დამსახურებაა ის ფაქტი, რომ შარშან, როდესაც ევროპულ ბაზარზე გაყიდვების მოცულობა შემცირდა, იაპონურმა კომპანიამ წინა წელთან შედარებით, 9 პროცენტით მეტი, 366 711 ავტომობილი გაჰყიდა. ევროპაში ”ნისანის” ბესტსელერი სწორედ ქროსოვერი ”ქაშკაია”, რომელიც შარშან ევროპაში 181 711 ცალი გაიყიდა (წინა წელთან შედარებით, 25.4 პროცენტით მეტი).

”ნისანი” იმედოვნებს, რომ წელს მთელ მსოფლიოში 140 000-150 000 ცალ ”ჯუკს” გაჰყიდის. კომპანია აცხადებს, რომ ამ ავტომობილისთვის მთავარი ბაზარი ევროპა იქნება, რომელიც ამ ქროსოვერის წლიური გაყიდვების 60-700 პროცენტს აითვისებს. ”ნისანის” აღმასრულებელ ვიცე პრეზიდენტ კოლინ დოჯის თქმით, ”ჯუკის” მყიდველთა დიდი ნაწილი 30-40 წლის მამაკაცები იქნებიან.

რაოდენ გასაკვირიც უნდა იყოს, ”ნისანი” ჯერჯერობით ჩინეთში ”ჯუკის” გაყიდვას არ გეგმავს. ამას კი დოჯი შემდეგნაირად განმარტავს: ”ჩინეთის ბაზარი სულ რაღაც 5-8 წლისაა და არავინ იცის, ხვალ როგორ შეიცვლება იქაური მყიდველის გემოვნება. ახლანდელი ავტომფლობელების უმეტესობა, თავის შემდეგ ავტომობილს იმავე კლასიდან არ შეიძენს, რომელი კლასის მანქანაც პირველად შეიძინა. მაგრამ 4-5 წლის შემდეგ იქ სიტუაცია რადიკალურად შეიცვლება და ჩვენც საბაზრო სტრატეგიას აუცილებლად გადავხედავთ”.

ძნელია, დაეთანხმო მსოფლიოს ერთ-ერთი უდიდესი ავტომწარმოებლის გამოცდილი ფუნქციონერის ასეთ პასიურობას, მითუმეტეს, როცა იცი, რომ ”ჯენერალ მოტორსი” და ”ფოლკსვაგენი” ცისქვეშეთში გაყიდვებს თითქმის ყოველწლიურად აორმაგებენ.

რაც შეეხება ”ჯუკს”, იაპონური კომპანია თავის მყიდველს ამ ავტომობილს სრულამძრავიანი, ან წინა წამყვანბორბლიანი ტრანსმისიებით შესთავაზებს. სრულამძრავიანი ტრანსმისიის ელექტრონული სისტემა მაბრუნ მომენტს წინა და უკანა ღერძებს შორის სიტუაციის შესაბამისად იმგვარად ანაწილებს, რომ მოხვევის დროს მოქნევის და მოცურების ალბათობა მაქსიმალურად გამოირიცხოს.

”ჯუკისთვის” ევროპულ ბაზარზე სულ სამი ძრავია გათვალისწინებული, რომელთაგან ერთი დიზელზე მუშაობს, ორი კი - ბენზინზე. ყველა მათგანი ევრო5 სტანდარტს აკმაყოფილებს.

”პორშემ” რბოლებისთვის ჰიბრიდული ავტომობილი მოამზადა

BMW — Mon, 15 Feb 2010 12:32:01 GMT

”პორშემ” თავისი სარბოლი ავტომიბილის, 911 GT3 R-ის ჰიბრიდული ვერსიის ფოტოები გაავრცელა, რომლის პრემიერა ჟენევის საავტომობილო შოუზე გაიმართება, მაისში კი მონაწილეობას ნურბურგრინგის 24-საათიან რბოლაში მიიღებს.

ჰიბრიდული 911 GT3 R აღჭურვილია ჰიბრიდული სისტემით, რომელშიც შიდაწვის ძრავთან, ორი ელექტროძრავია შეწყვილებული. ბენზინის V6 აგრეგატი, რომლის სიმძლავრეც 480 ცხენის ძალაა, ჩვეულ ადგილზე - ავტომობილის უკანა ნაწილშია მოთავსებული და მოძრაობაში უკანა ბორბლები მოჰყავს. ელექტროძრავები კი წინა ბორბლებს ემსახურება.

გარდა ამისა, ჰიბრიდულ სისტემაში შედის კინეტიკური ენერგიის რეკუპერაციის სისტემა (კერს-ი), რომელიც ფორმულა 1-ის ინგლისური გუნდის, ”უილიამსის” სპეციალისტების მიერაა შემუშავებული და დამუხრუჭების დროს გამოყოფილ ენერგიას აგროვებს. ეს სისტემა ავტომობილის მარჯვენა ნაწილში, იმ ადგილზეა მოთავსებული, რომელიც ჩვეულებრივ ავტომობილებში მგზავრის სავარძელს უკავია ხოლმე. მასში, მქნევარა გენერატორთანაა დაკავშირებული, რომელიც გამომუშავებულ ენერგიას მცირე ზომის აკუმულატორში აგროვებს.

კერს-ის სიმძლავრის პიკი 120 კილოვატს, ანუ 160 ცხენის ძალას აღწევს. სისტემაში ენერგიის დამგროვებლის მოვალეობას თავისუფალი მქნევარა ასრულებს. მასში დაგროვილ ენერგიას კი პილოტი თავისი სურვილის შესაბამისად იყენებს. ის აწვება საჭის რგოლზე მოთავსებულ ღილაკს და მაშინვე, აკუმულატორებში დაგროვილი ენერგია ელექტროძრავებს მიეწოდება, რომლებიც თავიანთ მაბრუნ მომენტს წინა ბორბლებს მიაწვდიან. ამ სისტემას 78 წამის განმავლობაში შეუძლია მუშაობა, რის შემდეგაც აკუმულატორები განიმუხტება.

ჯერჯერობით, ”პორშეს” არ გამოუქვეყნებია ჰიბრიდული 911 GT3 R-ის დინამიკური მახასიათებლები. გერმანული კომპანია ამ ინფორმაციას ჟენევურ გამოფენაზე გაგვაცნობს.

სამაგიეროდ, ”პორშეს” შეფმა მიხაელ მახტმა განაცხადა, რომ მისი კომპანიის გუნდი, მსგავსი სისტემით აღჭურვილ ავტომობილს ლე მანის 24-საათიანი რბოლისთვისაც მოამზადებს.

”ოპელი” ჟენევაში ახალ ელექტრონულ კონცეპციას გვაჩვენებს

BMW — Mon, 15 Feb 2010 12:30:06 GMT

”ჯენერალ მოტორსის” გერმანული შტო ”ოპელი” ჟენევის ავტო შოუზე თავის ახალ კონცეპტუალურ ნამუშევარს გამოიტანს, რომელსაც, გავრცელებული ინფორმაციით, ”ფლექსტრიმ GTE” ეწოდება. ამ კონცეპციაში ის ჰიბრიდული სისტემაა გამოყენებული, რომელიც ”გენერლებმა” ”შევროლე ვოლტისა” და ”ოპელ ამპერასთვის” შექმნეს.

”ოპელის” მიერ გამოქვეყნებული განცხადებით, კონცეპცია გვაჩვენებს, თუ რა მიმართულებით განვითარდება გერმანული კომპანიის ეკოლოგიურად სუფთა ტექნოლოგიები.

”ეს ავტომობილი იმის დადასტურებაა, რომ მანქანის გაბარიტები და კომფორტი არაა მისი ეკოლოგიური მაჩვენებლების გაუარესების მიზეზი”, - ნათქვამია ”ოპელის” მიერ გამოქვეყნებულ რელიზში.

როგორც სურათზე ჩანს, ”ფლექსტრიმ GTE-ზე” ”ოპელის” ემბლება აკუმულატორების დასამუხტ პორტადაა გამოყენებული და მას ორიგინალური დიზაინი აქვს. სურათზე ასევე ჩანს, რომ ლოგოს გარდა, ფსევდორადიატორის მარჯვენა მხარეს, წარწერა ”ვოლტეკია” მოთავსებული.

მიმომხილველები ვარაუდობენ, რომ აღნიშნულ კონცეპციას ”ჯენერალ მოტორსი” პირველად თავისი პრემიუმ ბრენდის, ”კადილაკის” ახალი მოდელებისთვის გამოიყენებს. უფრო კონკრეტულად კი, ”ვოლტეკის” პიონერი შეიძლება გახდეს სპორტული ”კადილაკ კონვერჯი”, რომლის პროექტიც, კრიზისის გამო, თაროზეა შემოდებული.
რამდენიმე დღის წინ, ”ოპელმა” თავისი ხუთწლიანი სამოქმედო გეგმა გამოაქვეყნა, რომელშიც წერია, რომ ამ პერიოდში, კომპანია თავის განვითარებას 11 მილიარდ ევროს მოახმარს. ამ თანხის დიდი ნაწილი ახალი მოდელების წარმოების დაწყებას მოხმარდება. ნაწილს კი კომპანია ახალი, ეკოლოგიური ტექნოლოგიების შემუშავებასა და წარმოებაში დანერგვას მოახმარს.

”კია” ”ტოიოტა პრიუსთან” კონკურენციისთვის ემზადება

BMW — Sat, 13 Feb 2010 19:49:54 GMT

ჩიკაგოს ავტო შოუზე, კორეულმა კომპანია ”კიამ” პლაგ-ინ ჰიბრიდული სისტემით აღჭურვილი კონცეპტუალური მოდელი ”რეი” გამოფინა, რომლის ბაზაზეც, მალე სერიული ავტომობილის წარმოება დაიწყება. კონცეპტუალური ავტომობილი გადამუშავებადი, ძალიან მსუბუქი პლასტიკითაა დამზადებული, მის სახურავზე კი ფოტოელემენტებია მოთავსებული, რომლებიც აკუმულატორებისთვის მზისგან მიღებულ ენერგიას ელექტროენერგიად გადაამუშავებენ.

”კია რეის” ჰიბრიდულ სისტემაში შედის ბენზინის 1.4-ლიტრიანი ძრავი, რომლის სიმძლავრეც 153 ცხენის ძალაა და 75-კილოვატიანი ელექტროძრავი, რომელსაც ენერგიით ლითიუმ-იონური აკუმულატორების ბლოკი კვებავს. მხოლოდ ელექტროძრავის ხარჯზე, ავტომობილს დაახლოებით 80 კილომეტრის გავლა შეუძლია. და თუ საქმეში შიდაწვის ძრავი და მასთან დაკავშირებული გენერატორი ჩაერთვება, მაშინ სვლის სიშორე 1 200 კილომეტრამდე გაიზრდება. თანაც, ”რეი” ყოველ 100 კილომეტრზე მხოლოდ 1.2 ლიტრ ბენზინს დაწვავს.

”კია რეის” ეკოლოგიურ თემას მასში გამოყენებული აუდიოსისტემა ”ინფინიტი გრინეჯიც” აგრძელებს, რომლის გამაძლიერებელი და დინამიკებიც, ჩვეულებრივ ანალოგებზე თითქმის ორჯერ ნაკლებ ენერგიას მოიხმარს. ენერგოდამზოგია ”მაიკროსოფტის” მიერ შემუშავებული მულტიმედიური სისტემა ”კია უვო-ც”.

”კიას” წარმომადგენელთა განცხადებით, ჩიკაგოში წარმოდგენილი კონცეპტუალური ”რეი” კორეული კომპანიის ახალი ქვებრენდის პირველი მერცხალია. ამ ბრენდის სახელწოდება ”კია ეკოდაინემიკსია”, ამ სახელით კი ეკონომიური და ეკოლოგიურად სუფთა ავტომობილების წარმოება იგეგმება.

რა თქმა უნდა, ამ ეტაპზე ჯერ ”კიაშიც” არ იციან, ”რეის” ბაზაზე დაიწყებენ თუ არა სერიული ავტომობილის წარმოებას.

უფრო მძლავრი და მსუბუქი ”მუსტანგ შელბი GT500”

BMW — Sat, 13 Feb 2010 19:47:46 GMT

”ფორდის” განყოფილება ”სპეშლ ვიჰაიქლ ტიმმა” (SVT - სპეციალური მანქანების გუნდმა) პოპულარულ მასკლ ქარ ”მუსტანგ შელბი GT500-ის” მოდიფიცირებული ვერსია მოამზადა, რომელიც საბაზო ვერსიასთან შედარებით, უფრო მსუბუქი და მძლავრია. ამასთან, მოდიფიცირებულ ავტომობილს სამუხრუჭე სისტემის უფრო ეფექტური გაგრილების სისტემა და სატერფულების ახალი კვანძიც აქვს.

SVT-ს მიერ მოდიფიცირებული ”შელბი GT500” ალუმუნის V8 ძრავითაა აღჭურვილი, რომლის მუშა მოცულობა 5.4 ლიტრია, მაქსიმალური სიმძლავრე კი 550 ცხენის ძალა, საბაზო ვერსიაზე 10 ცხენის ძალით მეტია. ახალი ძრავი თავის წინამორბედზე 46.2 კილოგრამით მსუბუქია, რისი წყალობითაც, ავტომობილის საწვავის ხარჯიც შემცირდა და რაც არანაკლებ მნიშვნელოვანია, გაიზარდა ავტომობილის ძრავის სიმძლავრისა და წონის ფარდობა.

”ფორდის” მონაცემებით, ახალი ”მუსტანგი” ქალაქში გადაადგილებისას, 100 კილომეტრზე ”მხოლოდ” 15.6 ლიტრ ბენზინს მოიხმარს, რაც საბაზო ვერსიის ხარჯზე ერთი ლიტრით ნაკლებია. ტრასაზე მოძრაობისას, ხარჯი 10.2 ლიტრამდე (0.4 ლიტრით ნაკლები საბაზო ვერსიისაზე) მცირდება.

ძრავის გარდა, მოდიფიცირებული ”შელბი GT500-სთვის”, SVT-ს სპეციალისტებმა სპეციალური სპორტ პაკეტი, ”SVT პერფორმენსიც” შეიმუშავეს, რომელშიც შედის მსუბუქი მეტალისგან დამზადებული 19-დუიმიანი წინა და 20-დუიმიანი უკანა ბორბლები, რომლებიც ”გუდიარის” წარმოების საბურავებით (იგლ F1 სუპერქარ G) არის შემოსილი. გაიზარდა ტრანსმისიის მთავარი წყვილის გადაცემის რიცხვი, საკიდარი კი უფრო ხისტი დრეკადი ელემენტებით აღიჭურვა.

”ფორდის” განცხადებით, ამ პაკეტის მეშვეობით, მოდიფიცირებული ”შელბი GT500” 2.3-მილიან (3.68 კმ) სატესტო ტრეკს, საბაზო ვერსიაზე თითქმის 3 წამით სწრაფად გადის.

ამერიკაში მოდიფიცირებული ”შელბი GT500-ის” გაყიდვა ზაფხულამდე დაიწყება, მისი საწყისი ფასი კი 49 495 დოლარი იქნება.

800-ცხენისძალიანი ”კადილაკი” ”ჰენესისგან”

BMW — Sat, 13 Feb 2010 19:46:24 GMT

ამერიკულმა სატუნინგო კომპანია ”ჰენესი პერფორმენს ინჯინიარინგმა” ”კადილაკის” სედანი CTS-V დაამუშავა და მყიდველს მისი სამი ახალი ვარიანტი შესთავაზა, რომლებიც ერთმანეთისგან ძრავების სიმძლავრით განსხვავდება.

სტანდარტულ ძრავ LSA V8-გან, რომლის სიმძლავრეც 550 ცხენის ძალაა, ”ჰენესის” სპეციალისტებმა სამი მოდიფიკაცია დაამზადეს. მათგან პირველის მაქსიმალური სიმძლავრე 650 ცხენის ძალაა, მაქსიმალური მაბრუნი მომენტი კი - 870 ნიუტონმეტრი (3400 ბრ/წთ-ზე).

LSA V8-ის მეორე მოდიფიკაციის სიმძლავრე 700 ცხენის ძალამდე გაიზარდა, მაბრუნი მომენტი კი - 950 ნიუტონმეტრამდე (იმავე 3400 ბრ/წთ-ზე). ძრავის ამ ვერსიით აღჭურვილი CTS-V ადგილიდან 100 კმ/სთ სიჩქარის აკრეფას 3.2 წამში ახერხებს, მისი მაქსიმალური სიჩქარე კი 340 კმ/სთ-ს აღწევს.

ყველაზე მძლავრი ძრავის მესამე ვერსიაა, რომლის მაქსიმალური სიმძლავრეც 800 ცხენის ძალამდე არის გაზრდილი, მაბრუნი მომენტი კი - 1060 ნიუტონმეტრამდე. ოღონდ, ამის დინამიკური მონაცემები არ გამოქვეყნებულა. ჯერჯერობით, არც სედან CTS-V-ის ამ სამი ვერსიის ფასებია ცნობილი.

”მერსედესი” სუპერ ელექტრომობილს გამოუშვებს

BMW — Tue, 26 Jan 2010 13:57:33 GMT

შესაძლოა, ბევრს არ მოსწონს ის, რომ მალე, საერთო სარგებლობის გზებზე ელექტრომობილები გამოჩნდება, რომლებიც თანდათან ჩაანაცვლებენ გარემოს დამაბინძურებელ შიდაწვისძრავიან ავტომობილებს. და ნუ იდარდებთ იმაზე, რომ ელექტრომობილები სუპერავტომობილების დინამიკას ვერასდროს შესწვდებიან. ჯერ ერთი, ეს მცდარი შეხედულებაა, რომელმაც დღემდე წინა საუკუნის დასაწყისიდან მოაღწია. მეორეც, სუპერავტომობილებს ხომ მხოლოდ უმდიდრესი ადამიანები ყიდულობენ, ასეთები კი ჩვენს შორის, ესე იგი, ამ ბლოგის მკითხველთა შორის ნაკლებად მეგულებიან.

ზემოთ რომ მცდარ შეხედულებაზე მოგახსენეთ, ერთ-ერთმა პირველმა ის კალიფორნიულმა კომპანია ”ტესლამ” გააქარვა, რომელიც უკვე რამდენიმე თვეა, ”ლოტუს ელისის” ბაზაზე ელექტრულ სუპერავტომობილს (სახელად როდსტერი) აწარმოებს, რომელიც აშშ-ში იმდენად პოპულარულია, რომ მისი სხვა ბაზრებზე, მათ შორის, ევროპულ ბაზარზე გატანაც გადაწყდა.

და რახან ასეა, მაშინ ავტოინდუსტრიის ვეშაპებს დიდხანს უქმედ ყოფნა როგორ შეეძლოთ. ჰოდა, მათგან პირველები რეაგირებას ”მერსედეს-ბენცი” და მის ჯგუფში შემავალი სატუნინგო კომპანია AMG აპირებენ, რომლებიც სუპერავტომობილ ”SLS AMG გალვინგის” (გალვინგ - თოლიას ფრთა) ბაზაზე ელექტრომობილის გამოშვებას 2015 წელს გეგმავენ.

აღსანიშნავია, რომ ”SLS AMG გალვინგის” წარმოება ჯერ არ დაწყებულა. უფრო მეტიც, ის კონცეპტუალური მოდელის სახითაც კი არავის უნახავს. ტესტირების დროს, მას ძლიერ შენიღბულს პერიოდულად კი უღებენ ფოტოებს, მაგრამ ავტომობილის შესახებ რაიმე დაზუსტებული ინფორმაცია ჯერ არ გავრცელებულა. ახლახანს კი გერმანულმა გამოცემა ”აუტო მოტორ უნდ შპორტმა” გაავრცელა ინფორმაცია იმის შესახებ, რომ ”SLS AMG გალვინგი” შეიძლება პირველად ფრანკფურტის წლევანდელ მოტორ შოუზე ეჩვენოს საზოგადოებას.

გერმანული ჟურნალის ცნობით, ელექტრომობილი ”SLS AMG გალვინგის” (სურათზე მისი ოფიციალური ესკიზია) ანალოგიურ ძარათი და ”თოლიას ფრთის” ტიპის კარებით შეიმოსება, თუმცაღა სრულიად განსხვავებულ შასიზე აიგება და საკიდარსაც განსხვავებულს მიიღებს, რასაც ელექტრომობილის თავისებურებანი განაპირობებს.

პირველი თავისებურება ისაა, რომ ელექტროძრავები, რომელთა სიმძლავრე 133 ცხენის ძალა იქნება, ოთხ ბორბალში მოთავსდება. შესაბამისად, მათი ჯამური სიმძლავრე 532 ცხენის ძალას, მაბრუნი მომენტი კი 880 ნიუტონმეტრს მიაღწევს. შედარებისთვის, შიდაწვისძრავიანი ”SLS AMG გალვინგი” 6.3-ლიტრიანი ძრავითაა აღჭურვილი, რომელიც 571 ცხ. ძ-ს და 649 ნმ-ს იძლევა. AMG-დან გამოსული ინფორმაციით, ელექტრომობილი ადგილიდან 100 კმ/სთ-ის აკრეფას 4 წამს მოანდომებს, მისი მაქსიმალური სიჩქარე კი დაახლოებით 200 კმ/სთ იქნება. სამაგიეროდ, სრულად დამუხტული ლითიუმ-იონური აკუმულატორები მას 150-180 კილომეტრს გაატარებს, მათი სრულად დამუხტვისთვის კი 5-6 საათი იქნება საჭირო.